Фото: Көрнекі сурет

ҚМДБ жанындағы «Қажылық қоры» ұйымдастырған отандық дизайнерлер арасындағы қажыларға арналған киім үлгісі байқауы өз мәресіне жетті. Бұл туралы ҚМДБ-ның баспасөз қызметі хабарлайды.

ҚМДБ-ның хабарлауынша, байқауға 14 дизайнер қатысқан. Ұсынылған жұмыстарға баға берушілер киімнің ыстық ауа райындағы қолайлылығы мен онда ұлттық нақыштың болуына назар аударған. «Абырой.кз» фирмасы ұсынған киім барлық талаптарға сай деп танылып, бас жүлдеге ілікті. Жеңімпазға Умра қажылығына барып-қайтуға тегін билет берілді.

ҚМДБ төрағасының орынбасары Бауыржан Есмаханның айтуынша, Қазақстанда 18 қажылық фирмасы бар екен. «Бұл — қажылық парызын өтеуге аттанған отандастарымыз 18 түрлі киім киеді деген сөз. Сондықтан да, бірлігімізді көрсету үшін бірегей киім үлгісін қалыптастыру керек болды», - дейді ол.

Фото: ca-news.org

Енді еліміздегі барлық қажылық фирмалар қажылыққа барушыларға стандартты киім үлгісін ұсынатын болды.

“The Qazaq Times”