Фото: airwars.org

Ирактың солтүстік бөлігінен "Ислам мемлекеті" лаңкестік ұйымы құрбандарының жаппай жерленген орны табылды. Аталған мекенді қазу кезінде 400-ге жуық адам сүйегі бір орынға көмілгені анықталды. Құрбандардың үстінде тұтқындардың киімі болған. Бұл туралы Әл-Жазира ақпараттық агенттігі жазды. 

Жаппай жерлеу орны Киркук қаласынан 45 км қашықтықта орналасқан "Ислам мемлекеті" лаңкестік ұйымының негізгі тіректерінің бірі Хавижа қаласының маңынан табылған. Ирак әскері аталған қала мен оған іргелес аумақтарды терроршылардың қолынан қазан айында азат етті.

Әл-Жазираның Ирактағы тілшісінің хабарлауынша, "Ислам мемлекеті" лаңкестік ұйымы өз билігіне қарсы адамдарды түрмеге жауып, көзін жойып отырған. Жуырда Associated Press ақпараттық агенттігі Сүрия мен Иракта лаңкестік ұйымның жалпы саны 72 тұтқындарды жерлеу орны бар екенін жазған болатын. Қазір фотосуреттер мен сұхбаттар арқылы солардың 17-нің мекен-жайы анықталды.

“The Qazaq Times”