Фото: Reuters

Түркия Ақ үйдің бұрынғы көмекшісі Майкл Флинге Фетхуллах Гюленді АҚШ-тан Түркияға жеткізіп беруді ұсынып, егер аталған ойды сәтті жүзеге асырса,  15 млн доллар көлемінде сыйақы беруге уәде еткен.  NBC News және  Wall Street Journal бірлесіп дайындаған есебінде АҚШ-тың Ұлттық қауіпсіздік жөніндегі бұрынғы кеңесшісі Майкл Флин мен оның ұлы Түркия мемлекетінің өкілдерімен кездесіп, жоғарыда аталған келісім ұсынылған болуы мүмкін деген болжам айтады. Бұл туралы ВВС ақпараттық агенттігі жазды. 

Аталған болжамды алғаш рет наурыз айында Орталық Барлау басқармасының бұрынғы басшысы Джеймс Вулси айтқан. Wall Street Journal өзі ұсынған айыптауларға негіз ретінде желтоқсан айының ортасында Майкл Флин мен Түркияның ресми тұлғалары арасында Нью-Йоркте өткен кездесуді алып отыр. Баяндамада берілген нұсқа бойынша Майкл Флин Фетхуллах Гюленді жеке ұшақта Түркиядағы Имралы аралында орналасқан түрмеге жеткізу қажет болған.

Фетхуллах Гюлен - Түркия Президенті Реджеп Тайып Ердоғанның ең үлкен қарсыластарының бірі саналады. Түркия билігі оны елде болған мемлекеттік төңкеріс жасауға талпынысқа кінәлі деп есептейді.

“The Qazaq Times”