Одесса облысының экс-губернаторы Михаил Саакашвили Украинаға қайтып оралатынын мәлімдеді.

«Мен АҚШ немесе басқа елдің көмегіне жүгінбей алдағы уақытта саяси күресті жалғастыру үшін Украинаға қайтып ораламын. Мені Украинадағы жақтастарым қолдайды деген ойдамын. Осы қадамым арқылы мен өзімді емес, өзгелерді бассыздықтан құтқарғым келеді» - деді Михаил Саакашвили тамыздың 1 күні өткізген бейне конференцияда.

Естеріңізге салайық, шілденің 26 күні Украина көші-қон қызметі ел президенті Петр Порошенко Михаил Саакашвилиді Украина азаматтығынан шығарып тастады деген ақпарат таратқан болатын.

Қазіргі таңда Грузияда Саакашвили үстінен бірнеше бап бойынша қылмыстық іс қозғалған. Осы уақытқа дейін Украина билігі Михаил Саакашвилиді Грузияға экстрадициялаудан бас тартып келген.

“The Qazaq Times”