Фото: 123ru.net

Австрияда Адольф Гитлер дүниеге келген үй мемлекет қарамағына өтті деп хабарлайды Неміс толқыны ақпарат агенттігі.

Австрияның коституциялық соты Гитлер дүниеге келген үйдің қазіргі иесінің қарсылығына қарамастан үйді үкімет қарамағына өткізуді қолдап шешім шығарды.

Адольф Гитлердің үйі Австрияның Инндағы Браунау (Braunau am Inn) қаласында орналасқан. Ол осы уақытқа дейін жеке адамдардың иелігінде болып келген. Австрия билігі бірнеше рет үй иесінен үйді сатып алғылары келетіндіктерін айтып ұсыныс жасаған. Алайда үй иесі ғимаратты сатудан бас тартқан. Екінші дүние жүзілік соғыстан бері Адольф Гитлер дүниеге келген үйде дүкен, кітапхана, мүгедектерге арналған ұстахана жұмыс істеген. Бірақ 2011 жылдан бері үй бос тұрған.

Үйді Австрия билігі өз қарамағына алғаннан кейін үйдің ендігі тағдыры қалай болатыны әзірге белгісіз. Бұған дейін Автрияның ішкі істер министрі Вольфганг Соботка Гитлер үйін бұзып тастау керектігін айтып ұсыныс жасаған болатын. Бірақ Адольф Гитлер үйі 1993 жылдан бері Зальцбург өңірінің архитектуралық құндылықтарға ие ғимараттар тобының құрамына кіреді яғни заңмен қорғалады.

“The Qazaq Times”