Ши Жинпиң, Путин, Трамп. Фото: Sputnik.

Уашингтонда орналасқан Pew Research Center ұйымы жариялаған жаңа сауалнама нәтижесінде, АҚШ президенті Дональд Трампның халықаралық саясатын 37 мемлекеттегі сауалнамаға қатысушылардың 22 пайызы ғана қолдау білдірген. Бұл көрсеткіш Барак Обама тұсында 64 пайызды құраған еді. Бұл туралы BBC ақпарат қызметінің ресми сайтында жарияланды.

Трамптың халықаралық саясатына наразылы білдірушілер Еуропа, Азия елдерімен қоса көршілесі Канада мен Мексикада да бар. Ал, АҚШ президентін қолдаушылар ең төмен елдер қатарында Швеция (10 %), Германия (11%) және Нидерланд (17%) елдері бар.

Pew Research Center жариялаған мәліметте әлем лидерлерінің арасында Қытай мен Ресей қатарлы елдердің басшыларын қолдаушылар саны төмен болған. Айталық, 37 елдегі қатысушылар Қытай басшысы Ши Жинпиңге 28 пайыз қолдау көрсетсе, Путинге 27 пайыз адам ғана дауыс берген. Әлем лидерлері арасында Германия канцлері Ангела Меркельдің абройы ең жоғары болып тұр. Оның саясатын 42 пайыз қатысушы қолдаған. Ал, Еуропа елдері арасында бұл көрсеткіш 60 пайызды құрады.

“The Qazaq Times”