Дәрігер коронавирус пневмониясына шалдыққан жасөспірім баланың білегіне ине қойып жатыр. Балалар қалалық клиникалық жұқпалы аурулар ауруханасы. 21 қыркүйек 2021 жыл. Алматы қаласы. Фото: QT / Күлтегін Аспанұлы

Қазақстанда коронавирус пен оған ұқсас пневмонияға шалдыққандар саны тағы 1,7 мыңға артып, жалпы есебі 967 мыңға жуықтаған. Өткен қыркүйек айында 99 мың адам ауырып, 2,1 мың адам көз жұмған.

Денсаулық сақтау министрлігінің ресми мәліметінше, елде 3 қазанда коронавирус (КВИ+) жұққан 1717 адам, ал 2-сі күні  коронавирус пневмониясына (КВИ-) шалдыққан 46 адам тіркелді. Сондай-ақ, өткен сенбіде 37 қазақстандық аурудан қайтыс болды. Былтыр дәл осы уақытта ресми статистикада тәулігіне 300-ге дейін науқас және 10-ға жетер-жетпес өлім жағдайы тіркелетін, стационарларда жатқан сырқаттар саны 3,5 мыңнан аспайтын еді. Қазір бұл көрсеткіш еселеп өсіп отыр, бүгінде елде 59 мың адам (КВИ+ бойынша 51 мың, КВИ- бойынша 8 мың) ауырып жатыр.

#COVID Өткен күні ПТР тесті арқылы коронавирус жұққаны расталған науқастар қатары тағы артты. Олардың басым бөлігі немесе 25%-ы әдеттегідей жоғары динамикада тұрған бір ғана Алматы (429) қаласына тиесілі. Ал астана (288), Қарағанды (179), Алматы (133), Павлодар (122), Қостанай (107), ШҚО (100), СҚО (72), Ақмола (53), БҚО (51), Жамбыл (47), Ақтөбе (38),  Шымкент (28), Түркістан (26), Атырау (23), Қызылорда (17), Маңғыстау (4) өңірлерінде біршама тұрақты. Жексенбіде аурудан айыққан 1913 адам үйіне шығарылған. 2 қазанда жиыны 31 адам қайтыс болған.

#COVID_пневмониясы механикалық әдіспен есепке алынатындықтан, демалыс күндері медстатистика жүйесі толық қамтылмайды. Салдарынан кейстер қатары сенбі және жексенбі, мереке күндері әдеттегіден айтарлықтай аз тіркеледі. Қазанның 2-сі ақпараты бір тәулікке кешігіп берілетін коронавирус пневмониясына шалдыққан 46 науқас есепке алынды. Ведомство дерегінше, бұл күні Шымкент (11), Алматы облысы (8), ШҚО (5), Жамбыл (5), Қарағанды (4) сырқаттар көптеп анықталған. Сонымен қоса, 136 адам айығып шыққан, тағы 6 адам көз жұмған.

#Жалпы  ДенМин дерегіне қарағанда, емделіп жатқан 59 мың науқастың 10 мыңы ауруханада, 48 мыңы амбулаторлық бақылауда. 765 науқастың жағдайы нашар, ондағы 224 адамның хәлі өте ауыр. Бұдан өзге 144 сырқат өкпені жасанды желдету аппаратымен тыныстап жатыр.

Эпидкартада «жасыл аймақтағы» Түркістан, Маңғыстау, Қызылорда және Жамбыл облыстарынан басқа Шымкент, Атырау, Ақтөбе, СҚО, БҚО, ШҚО, Ақмола, Алматы облыстары «сары аймаққа» өткен. Басқа 4 аймақ тұтастай «қызыл аймақта» тұр.

ДенМиннің QT редакциясына берген мәліметінше, 11 наурыз бен 12 шілде аралығында ПТР тесті оң көрсеткен 1311 сынама секвенирленген (штамм түрін анықтайтын талдау). Сәйкесінше, биыл көктем-жазда геномдық зерттеу нәтижесінде елдің басым бөлігінен вирустың бразилиялық, британдық, оңтүстікафрикалық, үндістандық және нигериялық штамдары анықталған.

Биылғы жаз мезгілі қазақстандықтар үшін қаралы хабарға толы болды. Пандемия басталғалы 1,5 жылдың ішінде анықталған барлық аурушаңдық пен өлім жағдайының жартысы тек өткен жазда, төртінші толқында тіркелді. Жазғы үш айда бас-аяғы 420 мың адам ауырса, 6,6 мыңнан аса адам көз жұмды. Қыркүйек айының өзінде 99 мыңдай науқас есепке алынған және 2117 адам қайтыс болған.

Былтыр 13 наурыздан бері COVID-19 инфекциясын жұқтырғандар қатары 892 мыңға жуықтаса, 1 тамыздан бергі коронавирус пневмониясы 76 мыңнан асқан. ДДСҰ дерекқоры мен Ұлттық статистикада Қазақстанда ауырғандар саны 967 мыңға жуықтаған. Дегенмен Үкімет коронавирус пен оның пневмониясын екі бөлек есептейді.

Пандемия басталғалы жалпы вирус жұққандардан 19,3 мың адам (КВИ+ / U07.1 – 11 323, КВИ- / U07.2 – 4856, ілеспе аурулардан – 3123) қайтыс болған. Алайда Қазақстан билігі бойынан коронавирус табылса да, басқа аурулардың себебінен қайтыс болды делінгендерді жалпы статистикаға енгізбейді. Бұған қарсы сарапшылардың сөзіне қарағанда, коронавирустың жанама әсерінен қайтқандардың жартысынан астамының себебі қан айналымы жүйесінің аурулары болғандықтан, оған инфекция дерт қоздырушы фактор ретінде өлімге әкеп соқтырған.

Қазақстан вирус таралуы бойынша әлемде Джонс Хопкинс университеті және ДДСҰ тізіміндегі 221 ел мен аймақтың арасында 36-орынға орнықты.

Үкіметтің соңғы дерегіне қарағанда, Қазақстанда 6,6 млн адам коронавирусқа қарсы вакцинаны толық алған, ал кемінде бірінші дозасы егілген жұрттың саны 7,7 млн-нан асады.

The Qazaq Times