Шұғыл шақырту бойынша тұрғын үйдің біріне келген жедел жәрдем қызметінің коронавирустық бригадасы. Сәуір 2021 жыл. Алматы қаласы. Фото: QT / Күлтегін Аспанұлы

Алматыда бір адамнан коронавирустың "үндістандық штамы" анықталды. Бұл туралы 23 маусым күнгі брифинг кезінде қаланың бас санитар дәрігері Жандарбек Бекшин хабарлады.

"Алматыда бір адамнан анықталды. Біз онымен қарым-қатынаста болған адамдардың барлығын есепке алдық. Ол – үй шаруасындағы әйел, үнемі үйде отырған. Күйеуі ары-бері көп жүретін мамандық иесі, бірақ ол ақпан айында ауырып шыққан" деді Бекшин сәрсенбі күнгі брифингте.

Оның айтуынша, нәтижесі оң шыққан ПТР-тестерді тексеріп шыққан кезде 89 пайызынан вирус мутациясы анықталған.

"12-19 маусым аралығында мутацияланған штамдардың айналымын анықтау үшін ПТР-диагностика жүргіздік. 53 зерттеудің 44-інен - британдық штамм, екеуінен – оңтүстікафрикалық, біреуінен нью-йорктік штамм анықталды. Қалған 11 пайызында вирус мутациясы анықталмады" деді Бекшин.

Бұған дейін ел астанасында да коронавирустың "үндістандық шатаммы" анықталған. Соған байланысты елордада карантинді күшейту туралы шешім қабылданды. Ведомствоаралық комиссия елде қызмет көрсету саласында істейтін компаниялар мен ірі мекеме қызметкерлеріне вакцина міндеттеу туралы ұсыныс айтты.

Коронавирустың үндістандық штамы – SARS-CoV-2 вирусының төртінші нұсқасы. Дүниежүзілік денсаулық сақтау ұйымы оны ғаламдық деңгейде алаңдаушылық тудыратын штамдар тізіміне енгізген. Бұл тізімге вирустың тез жұғатын, ауруды асқындырып жіберетін және вакцина мен дәрі-дәрмекке бой бермейтін түрлері енген. Үндістандық штамм 70-тен астам елде анықталған.

"The Qazaq Times"