Фото: https://tengrinews.kz

Ұлыбританияда Қазақстанда өтетін кезектен тыс президенттік сайлау талқыланды.

Қазақстанның Британиядағы елшісі Ерлан Ыдырысов жергілікті саяси және бизнес элита, сондай-ақ БАҚ өкілдеріне кезектен тыс президенттік сайлаудың қазақстандықтар үшін маңызын және оған дайындық туралы әңгімеледі. Кездесу Ұлыбританиядағы саясат пен бизнестегі көшбасшылардың басын біріктіретін орталық – Лондон директорлар институтында өткен. Басқосу кезінде Қазақстандағы реформалар мен алдағы сайлауға дайындық шаралары талқыланған.

CMS Cameron Mckenna Nabarro Olswang LLP компаниясының кеңесшісі Тревор Бартон: «Елші сайлау өткізудің ережелері туралы айтты. Біз науқанның демократиялық нормаларға толық жауап беретіндігін түсіндік. Бірнеше кандидат бар екен. Сайлау нәтижелерін асыға күтетін боламыз және әділ сайлау өтеді деген ойдамыз», – дейді.

Айта кетейік, биыл кезектен тыс президенттік сайлау 9 маусымда өтеді. Осы жолы ҚР ОСК жеті кандидатты тіркеді. Олардың ішінде «Nur Otan» партиясынан Қасым-Жомарт Тоқаев, «Ұлт тағдыры» ұлттық-патриоттық қозғалысы ұсынған кандидат Әміржан Қосанов, «Ауыл» халықтық-демократиялық патриоттық партиясынан Төлеутай Рахымбеков, Қазақстанның коммунистер партиясынан Жамбыл Ахметбеков, «Ұлы дала қырандары» республикалық қозғалысынан Сәді-Бек Түгел, Қазақстан Республикасының кәсіподақтар федерациясынан Амангелді Таспихов және «Ақ жол» Қазақстанның демократиялық партиясынан Дания Еспаева бар.

"The Qazaq Times"