Фото: bbc.com

Американың 45-ші президенті Доналд Трамп қызметіне кіріскен кезінде-ақ АҚШ пен Мексика арасында қорған тұрғызатынын  жеткізген болатын. Енді Трамп Мексика шекарасындағы құрылыс жұмыстарын жоспардан бұрын бастауға бұйрық берді. Бұл туралы BBC агенттігі хабарлайды.

«Біз қорған тұрғызамыз және оны мерзімінен бұрын, жақын арада бастап та кетеміз», – дейді АҚШ президенті жұма күні болған консервативті саяси іс-шаралар конференциясында.

Агенттіктің хабарлауынша, Трамп  «қашан да америкалықтардың бірінші орында тұратындығын» және «елдегі жаман адамдарды қуғынға ұшырататындығын» айтқан.

Екі ел арасындағы қабырға Мексикадан АҚШ-қа кіретін заңсыз иммигранттар ағынын тоқтатуға бағытталған.  Трамп аталмыш құрылыстың наркомафияға тосқауыл болатындығына сенімді.

Ақ үй басшысы бұл қорған үшін америкалықтар бір тиын да төлемейтіндігін, барлық қаражатты мексикандықтар өз мойнына алатындығын жеткізді.

АҚШ ІІМ-нің мәліметіне сүйенсек құрылыстың құны $21,6 млрд АҚШ доллары.

«The Qazaq Times»