Францияда қақтығыс ұйымдастырып, ереуілге шыққандарға енді қатаң жаза қолданылады.

Ел президенті Эммануэль Макрон осындай мәлімдеме жасады. Ол өз сөзінде: «Елдегі орын алып жатқан жағдайларды ішкі істер министрлігі қадағалап, күн сайын хабардар етіп отыр. Арандатушылар мен құқық бұзғандар заң алдында жауап береді. Біздің мемлекетімізге бейбітшілік пен ынтымақ қажет. Бұлай жалғаса берсе, Франция бейбітшілігіне нұқсан келеді», – деді.

Айта кетейік, осы апта Франциядағы наразылық шеруі қайта басталып, 24 мыңға жуық адам билік саясатына қарсы ереуілге шыққан. Париж орталығына жиналған мыңға жуық адам ел президенті Эммануэль Макрон зейнетақы мен салық жүйесіне қатысты уәдесін орындамай отыр дейді. Шерудің арты қақтығысқа ұласып, екі жүзден астам адам қамауға алынды. Франциялық «Лэ Монд» басылымының жазуынша, ел көлемінде шеруге қатысушылардың саны 40 мыңнан асқан.

"The Qazaq Times"