АҚШ пен Таяу Шығыс елдері жаңа әскери альянс құрмақ.

«Неміс толқыны» ақпарат агенттігінің мәліметінше, АҚШ пен Араб елдері НАТО-ға ұқсас MESA әскери альянсын құрмақ.

Желтоқсан айының 9-ы күні Сауд Арабиясының сыртқы істер министрі Адель әл-Жубейр аталмыш мәселеге қатысты мәлімдеме жасады. Оның сөзінше, қазіргі таңда Араб елдері Таяу Шығыс қауіпсіздігін қамтамасыз ету мақсатында АҚШ-пен бірлесіп жаңа әскери стратегиялық альянс құру үшін келіссөздер жүргізуде.

«Біздің басты мақсатымыз – Таяу Шығыс қауіпсіздігін қамтамасыз етуге байланысты келісімге келу. Бұл өз кезегінде аймақты сыртқы күштердің арандату әрекеттерінен қорғайды және АҚШ-пен қарым-қатынас орнатуға септігін тигізеді» - деп мәлімдеді әл-Жубейр.

Айта кететін бір жайт, қазіргі уақытта аймақта Түркия, Ресей, Иран үштігі бірігіп іс-қимылдар жасауда. Атап айтқанда Анкара, Мәскеу, Теһран Сүрия мәселесінде күш біріктіріп, кез келген әскери операцияларын өзара келісім арқылы жүзеге асыруда.

"The Qazaq Times"