Қазақстан мен Ресей Байқоңыр ғарыш айлағынан ұшырылған «Союз МС-10» кемесінің апатқа ұшырауына байланысты бірлескен үкімет комиссиясын құратын болды. Бұл туралы ҚР ІІМ қарасты төтенше жағдайлар комитетінің төрағасы Владимир Беккер мәлімдеді.

«Қазақстан мен Ресейдің тиісті органдарынан жасақталған арнайы комиссия құрылатын болады. Оқиға толыққанды тексеріледі. Біз ақпараттармен міндетті түрде бөлісетін боламыз» - деді Байқоңырда болған апатқа байланысты өткен арнайы брифингте ведомства басшысы.

Естеріңізге салайық, 11 қазан күні сағат 14:40-та Байқоңыр ғарыш айлағынан бортында «Союз МС-10» кемесі бар «Союз ФГ» зымыраны ұшырылған. Бірақ зымыран әуеге көтерілген бетте апатқа ұшырап, экипаж мүшелері жерге қонуға мәжбүр болған.

"The Qazaq Times"