Ормуз бұғазы – әлем мұнай тасымалының күре тамыры. Фото: Oil Price.

Иран мен АҚШ арасындағы теке-тірес күшейген сайын Батыс елдері өздеріне жететін мұнай тасымал жолының өзегі Ормуз бұғазының жабылып қалуынан қатты алаңдауда. Жақында Ирактың осы саладағы сарапшы маманы бұл туралы пікір білдіріп: «Өңірдегі қайшылықтар салдарынан Ормуз бұғазы жабылатын болса, мұнайдың әр баррелі 400 АҚШ долларына дейін қымбаттайды», – деген болжам айтты. Бұл туралы IRNA ақпараттық агенттігі хабарлады.

Ирактың «әл-Малуме» арнасына сұхбат берген халықаралық саяси сарапшы Хамза Жавхери сөзінде: «Ормуз бұғазының жабылуы Батыстағы индустриялды елдердің көбі экономикалық құлдырауға ұшырайды. Бұл елдердің өндірісі мұнайға көбірек тәуелді. Ормуз бұғазының жабылуы Үшінші дүниежүзілік соғыстың басталуына апарып соғады», – деді.

Өткен аптада АҚШ-Иран арасындағы асқына түскен қайшылық әлем назарын өзіне аударған болатын. Екі елдің басшылары бір-біріне қатаң ескертулер жасап, тіпті күш қолданудан тайынбайтынын да айтқан еді.

“The Qazaq Times”