Елімізде келесі жылдан бастап мемлекеттік қызметкерлерге жалақы төлеудің жаңа жүйесі енгізілмек. Бұл туралы Мемлекеттік қызмет істері және сыбайлас жемқорлыққа қарсы күрес агенттігінің төрағасы Алик Шпекбаев мәлімдеді.

 

Алик Шпекбаев. Фото: kyzmet.gov.kz

"Бүгінде біз еңбекақы төлеудің жаңа жүйесін апробациялап жатырмыз. Факторлық-балдық шкала негізіндегі бұл жүйе пилоттық органдардағы лауазымдық жалақыны екі есеге дейін көбейтуге мүмкіндік береді. Келесі жылы біздің бастамамыз, яғни пилоттық жобамыз аяқталады. Сәйкесінше, Қазақстанның барлық мемлекеттік қызметшілерінің жалақысы көбейеді", - деді Алик Шпекбаев.

 

Агенттік төрағасы егер мемлекеттік қызметкерлердің айлық ақысы көбейсе, онда пара алу деректері де күрт қысқарар еді дейді. Одан бөлек, келесі жылдан бастап мемлекеттік қызметкерлердің баспаналы болуына да жіті мән берілмек. Оларға жеңілдетілген шарттар ұсынылады.

“The Qazaq Times”