Фото: Алматы қаласы әкімдігінің баспасөз қызметі

Бүгін Алматыда 1931-1933 жылдарғы ашаршылық құрбандарының ескерткішіне гүл шоқтары қойылды. Аталған шараға қоғам қайраткерлері, репрессия мен ашаршылық құрбандарының ұрпақтары, үкіметтік емес ұйымдардың өкілдері және қала жастары қатысты.

Алматы әкімі Бауыржан Байбек былтыр мемлекет басшысының тапсырмасымен қала орталығында ашаршылық құрбандарына ескерткіш орнатылғанын айтып, ерекше мүсінде - қолына арып-ашқан, өлімші хәлдегі баласын ұстаған ана бейнесіндегі қазақ халқының ауыр тағдыры бейнеленгенін атап өтті.

Фото: Алматы қаласы әкімдігінің баспасөз қызметі

«Тарихтың шерлі үнін жеткізген бұл ескерткіш – қаламыздың киелі нысандар тізіміне енді. Бұл – Елбасы атап өткендей, «ашаршылықта құрбан болған миллиондардың рухына бүгінгі буыннан тағзым және келер ұрпақ ата-бабаларының қандай қасіреттерді бастан өткергенін біліп жүруіне қажет тағылым», - деді Бауыржан Байбек.

Ол сол бір қасіретті жылдары қазақ халқының өз еңсесін тік көтеріп қана қоймай, қазақ  топырағына жер аударылған өзге ұлт өкілдерін бауырына тартып, қамқорлығына алғанын  атап өтті.

Фото: Алматы қаласы әкімдігінің баспасөз қызметі

Еске салсақ, былтыр «Қарағайлы» саябағында 1931-1933 жылдардағы ашаршылық құрбандарына ескерткіш  орнатылған болатын. Биіктігі  үш метрлік қола мен граниттен құйылған мүсінде аштықтан өлімші болған  баласын кеудесіне басқан ана бейнеленген.

Қазақстанда 1918 жылдан 1933 жылдар ішінде түрлі мәліметтер бойынша 3 миллионнан астам адам жаппай қырылған. Оның жартысынан астамы 1931-1933 жылдардағы ақжем ашаршылық кезінде шейіт болғандар. Ал 1937-1938 жылдары 100 мыңнан астам қазақстандық көз жұмды.

“The Qazaq Times”