Түркия президенті Режеп Тайып Ердоған мен Украина басшысы Петр Порошенко. Фото: News Front

Түркия президенті Режеп Тайып Ердоған халықаралық деңгейде Қырым татарларын қорғайтынын мәлімдеді.

Қазан айының 9-ы күні Украина астанасы Киевте Петр Порошенкомен кездескен Режеп Тайып Ердоған Қырымға қатысты өз ойын білдірді. Ол онда: «Түркия қашанда Украинаның тұтастығы мен тәуелсіздігін қолдайды. Біз осыған дейін де Қырымның заңсыз аннексиялануын мойындамайтынымызды айтқанбыз. Осыдан кейін де сол пікірімізде қаламыз. Біз алдағы уақытта қандас бауырларымыз Қырым татарларының мүддесін халықаралық деңгейде қорғайтын боламыз» - деген.

Бұдан бөлек екі ел басшылары Донбасс пен Луганскідегі соғыс жайында, екі ел арасындағы сауда айналымы мен Минск келісімі жайында сөз қозғаған. Кездесу соңында Украина президенті Петр Порошенко Режеп Тайып Ердоғанға Қырым татарларын қолдағаны үшін рахмет айтқан.

“The Qazaq Times”