Қазақ-қырғыз шекарасын заңсыз өтпек болған қарулы қырғыз азаматы ұсталды, деп хабарлайды Алматы облысының ішкі істер департаментінің баспасөз қызметі.

Ведомство таратқан мәлімет бойынша, 41 жастағы Қырғызстан азаматын тамыздың 16-сы күні Алматы облысына қарасты Райымбек ауданының шекарашылары ұстаған. Тексеру кезінде шекарадан заңсыз өткен азаматтан 7,62 милиметрлік «Тигр» қаруы тәркіленген.

Тергеу барысында Қырғызстан азаматы жоғалған малын іздеп жүріп Қазақстан шекарасына адасып өтіп кеткендігін айтқан. Қазіргі таңда оның үстінен қылмыстық іс қозғалған.

Естеріңізге салайық, бұған дейін тамыздың 12-сі күні Жамбыл обылысында Қазақстан мен Қырғызстан шектесетін «Жасөркен» заставасында заңға бағынбай, шекара сымдарын бұзып мал айдап өтпек болған 15 адамға шекарашылар оқ атып, салдарынан бір адам көз жұмған болатын.

“The Qazaq Times”