Режеп Тайып Ердоған. Фото: Faz.net.

Түркия президенті Стамбулдағы бір мешіттің ашылуында сөз сөйлеп өзінің дінді табанды әрі батыл қолдайтынын жеткізді. Ол сөзінде «дінді жеттік білетін ұрпақ тәрбиелеп шығамыз» деді. Бұл туралы «Түрік Теле-Радио» қызметінің ресми сайты хабарлады.

Стамбулда «Жұлдыз Хамидие атындағы мешіттің» ашылуында Ердоған өзінің діндар басшы екенін анық танытты. Ол: «Дініміздің өзегі болған мешіттерді жаңғыртамыз. Ұлтымыздың рухы мықты. Крест жорықтары заманынан бері жалғасып келе жатқан күрестің батыл жауынгері деген даңққа ие. Бүгінде дұшпандарымыз еліміз бен дінімізге шабуылдап, мешіттерді қарауылға алуда», – деді.

Ердоған билігі Түркияда діншілдерді жақтаушы билік ретінде белгілі. Батыс жұртымен қарым-қатынасы салқындаған Ердоған билігі, араб елдері арасындағы жанжалдарды реттеп, қарым-қатынасын тұрақтандыруға тырысты. Катар дағдарысы кезінде де араб елдері арасында делдалдыққа көп рет жүрді. Қазір Катар мен Түркия арасында әскери ынтымақтастық нығайып, Парсы Шығанағына Түркияның әскери базасы салынғалы тұр.

“The Qazaq Times”