Муамар Каддафидің ұлы Сейф әл-Ислам.

Ливияда Муамар Каддафидің ұлы бостандыққа шықты деп хабарлайды Неміс толқыны ақпарат агенттігі.

Каддафидің ұлы Әл-Ислам Шығыс Ливия парламенті қабылдаған амнистия заңы бойынша бостандыққа шықты.

Муамар Каддафидің өлімінен кейін 2015 жылдың 28 шілдесінде Ливия соты Сейф әл-Исламды өлім жазасына кескен болатын. Ол 2011 жылдан бері Ливия көтерілісшілерінің иелігіндегі елдің солтүстік-батысында орналасқан Зинтан түрмесінде отырған.

Көтерілісшілер осы уақытқа дейін Әл-Исламды халықаралық дәрежеде мойындалған Триполи үкіметіне беруден бас тартып келген.

Қазіргі таңда Әл-Исламның түрмеден шығып қайда бет алғандығы белгісіз. Оның қорғаушысының айтуынша Әл-Исламның қайда екендігін айту оның өміріне қауіп төндіруі мүмкін. Сол себепті Каддафи ұлының қазіргі мекен-жайы құпия күйінде қалмақ.

“The Qazaq Times”