Балалар қалалық клиникалық жұқпалы аурулар ауруханасының модульді филиалындағы реанимация бөлімінде коронавируспен сырқаттанып жатқан науқас. 21 қыркүйек 2021 жыл. Алматы қаласы. Фото: QT / Күлтегін Аспанұлы

Қазақстанда коронавирус пен оған ұқсас пневмонияға шалдыққандар саны тағы 2,7 мыңға артып, жалпы есебі 941 мыңнан асты. Кейінгі үш аптаның өзінде 78 мыңға тарта адам ауырып, 1,6 мыңнан аса адам көз жұмған.

Төртінші толқын екпіндей бастаған шілде айының ортасына қарай тәуліктік сырқаттар саны 5 мыңның, тамызға қарай 7 мыңның үстіне шыққан, індет қарқыны екі аптадан бері 5 мыңнан 3 мың кейске маңайлады.  Денсаулық сақтау министрлігінің ресми мәліметінше, елде 21 қыркүйекте коронавирус (КВИ+) жұққан 2411 адам, ал 20-сы күні  коронавирус пневмониясына (КВИ-) шалдыққан 317 адам тіркелді және дүйсенбіде 59 қазақстандық аурудан қайтыс болды. Қазір елде 67 мың адам (КВИ+ бойынша 58 мың, КВИ- бойынша 8 мың) ауырып жатыр.

#COVID Өткен күні ПТР тесті арқылы коронавирус жұққаны расталған науқастар қатары тағы артты. Олардың басым бөлігі немесе 20%-ы әдеттегідей жоғары динамикада тұрған бір ғана Алматы (498) қаласына тиесілі. Ал Қарағанды (396), Алматы (232), Павлодар (188), астана (187), Ақмола (148), Ақтөбе (118), ШҚО (103), Қостанай (102), Шымкент (99), СҚО (78), Атырау (61), БҚО (55), Жамбыл (53), Қызылорда (45),  Түркістан (30), Маңғыстау (18) өңірлерінде дерт қарқыны тұрақты. Сейсенбіде аурудан айыққан 3865 адам үйіне шығарылған. 20 қыркүйекте жиыны 50 адам қайтыс болған.

#COVID_пневмониясы Қыркүйектің 20-сы ақпараты бір тәулікке кешігіп берілетін коронавирус пневмониясына шалдыққан 317 науқас есепке алынды. Ведомство дерегінше, бұл күні Шымкент (71), Алматы облысы (48), ШҚО (37), Жамбыл (30), Алматы (22) сырқаттар көптеп анықталған. Сонымен қоса, 203 адам айығып шыққан, тағы 9 адам көз жұмған.

#Жалпы  ДенМин дерегіне қарағанда, емделіп жатқан 67 мың науқастың 12 мыңға жуығы ауруханада, 55 мыңы амбулаторлық бақылауда. 1 мың науқастың жағдайы нашар, ондағы 248 адамның хәлі өте ауыр. Бұдан өзге 143 сырқат өкпені жасанды желдету аппаратымен тыныстап жатыр.

Эпидкартада «жасыл аймақтағы» Түркістан, Маңғыстау және Жамбыл облыстарынан басқа Шымкент, Атырау, Алматы, Қызылорда, СҚО, БҚО, ШҚО, Алматы облыстары «сары аймаққа» өткен. Басқа 7 аймақ тұтастай «қызыл аймақта» тұр.

ДенМиннің QT редакциясына берген мәліметінше, 11 наурыз бен 12 шілде аралығында ПТР тесті оң көрсеткен 1311 сынама секвенирленген (штамм түрін анықтайтын талдау). Сәйкесінше, биыл көктем-жазда геномдық зерттеу нәтижесінде елдің басым бөлігінен вирустың бразилиялық, британдық, оңтүстікафрикалық, үндістандық және нигериялық штамдары анықталған.

Биылғы жаз мезгілі қазақстандықтар үшін қаралы хабарға толы болды. Пандемия басталғалы 1,5 жылдың ішінде анықталған барлық аурушаңдық пен өлім жағдайының жартысы тек өткен жазда, төртінші толқында тіркелді. Үш айда бас-аяғы 420 мың адам ауырса, 6,6 мыңнан аса адам көз жұмды. Қыркүйек айының үш аптасында 78 мыңдай науқас есепке алынған және 1640 адам қайтыс болған.

Былтыр 13 наурыздан бері COVID-19 инфекциясын жұқтырғандар қатары 867 мыңнан, 1 тамыздан бергі коронавирус пневмониясы 74 мыңнан асқан. ДДСҰ дерекқоры мен Ұлттық статистикада Қазақстанда ауырғандар саны 941 мыңға жетті. Дегенмен Үкімет коронавирус пен оның пневмониясын екі бөлек есептейді.

Пандемия басталғалы жалпы вирус жұққандардан 18,7 мыңнан аса адам (КВИ+ / U07.1 – 10 860, КВИ- / U07.2 – 4760, ілеспе аурулардан – 3123) қайтыс болған. Алайда Қазақстан билігі бойынан коронавирус табылса да, басқа аурулардың себебінен қайтыс болды делінгендерді жалпы статистикаға енгізбейді. Бұған қарсы сарапшылардың сөзіне қарағанда, коронавирустың жанама әсерінен қайтқандардың жартысынан астамының себебі қан айналымы жүйесінің аурулары болғандықтан, оған инфекция дерт қоздырушы фактор ретінде өлімге әкеп соқтырған.

Қазақстан вирус таралуы бойынша әлемде Джонс Хопкинс университеті және ДДСҰ тізіміндегі 221 ел мен аймақтың арасында 36-орынға орнықты.

Үкіметтің соңғы дерегіне қарағанда, Қазақстанда 6,2 млн адам коронавирусқа қарсы вакцинаны толық алған, ал кемінде бірінші дозасы егілген жұрттың саны 7,3 млн-нан асады.

The Qazaq Times