Кеше, 23 тамыз күні Шымкенттегі Еңбекші аудандық полиция басқармасы Орынбаев атындағы гипербариялық оксигенация орталығында қайтыс болараның алдында "оттегі жетпей жатқанын" жазып кеткен ер адамның хатына байланысты қылмыстық іс қозғады. Бұл туралы қалалық полиция департаментінің мәліметіне сүйенген Азаттық радиосы хабарлады. 

22 тамыз кешке Instagram желісінде орталықта коронавирустан қайтыс болған Бақ есімді адамның хатын жарияланған. Хатта ол өзіне оттегі жетпей жатқанын, оттегіні жиі өшіретінін және өліп қалуы мүмкін екенін жазып, басқа жерге алмастыруды сұрайды.

Азаттық мәліметінше, марқұмның хатын жариялаған парақша жүргізушісі  хатты аты-жөнін жариялауды қаламайтын орталық қызметкері жібергенін айтқан. Хат марқұмның туысқандарына жетпеген.

Бейресми мәліметтерге қарағанда, орталықта хаттың иесі болуы мүмкін деген адам қайтыс болған. Оның отбасында үш адам коронавирус жұқтырып, орталыққа түскен. Туыстары марқұмның жерленгенін айтқан.

Шымкент қалалық денсаулық сақтау басқармасы бұл хаттың орталықтан шаққанын растай да алмайды, жоққа да шығармайды. Орталықтың бас дәрігері Мадина Ермаханбетова оттегі толық жететінін, оттегі жетіспеушілігінен қайтыс болған адам жоқ екенін айтады.

Десе де полиция әлеуметтік желіде тарап кеткен хатқа байланысты Қылмыстық кодекстің "Медицина немесе фармацевтика жұмыскерінің кәсіптік міндеттерін тиісінше орындамауы" (317-бап) бабымен қылмыстық іс қозғалғанын, тергеу амалдары басталғанын хабарлады.

The Qazaq Times