Пандемия басталғалы Қазақстанда вирус жұққандардың 4,5 мыңы өмірден өткен. Денсаулық сақтау министрлігінің ресми дерегі бойынша, елде 5 наурыз күні коронавирус жұққан 832 адам, ал 4-і коронавирус пневмониясына шалдыққан 42 адам тіркелді. Қазір елде 19 мыңға жуық адам (U07.1 немесе КВИ+ бойынша 13 318, U07.2 немесе КВИ- бойынша 5471) ауырып жатыр.

#U07.1 Коронавирус ПТР тесті арқылы табылған жаңа кейстердің ең көбі – астана (136), Алматы қаласы (135), Павлодар (75), БҚО (69), Ақмола (59), Қостанай (57)  өңірлерінде. Өткен тәулікте аурудан айыққан 742 адам үйіне жіберілген. Бұдан өзге наурыздың 4-і жиыны 8 адам: Алматы қаласы (3), астана (2), Қарағанды (2), Павлодар (1) облыстарында қайтыс болған.

Кейінгі екі аптада Алматы вирус жұққандар саны жағынан өңірлер арасында алғашқы қатарлардан көрінді. Дегенмен қаладағы эпиджағдай «жасыл деңгейде» деп санайтын бас санитар-дәрігер Жандарбек Бекшин 13 ақпан карантин шарасын жеңілдедетін жаңа қаулы шығарды. Құжатқа сәйкес, қоғамдық тамақтану орындары түн жарымға дейін, базар-сауда орындары апта бойы, сауна-бассейн және санаторийлерге, бильярд, боулинг, ойынханаларға, аймақтар арасында қатынайтын автобустарға жұмыс істеуге рұқсат етілді.

#U07.2  4 наурыз ақпараты бір тәулікке кешігіп берілетін коронавирус пневмониясына шалдыққан 42 науқас және 2 өлім жағдайы тіркелді. Пневмония анықталған науқстардың ең көбі – Алматы қаласы (8) және Алматы (8), Жамбыл (5), ШҚО (4), Ақмола (4)  облыстарына тиесілі. Сонымен қоса, Шымкент қаласы мен Алматы облысында бір-бір адамнан көз жұмған.  пневмониядан айыққандар саны 215-ке артты.

#Жалпы  Елде қаңтар айының екінші мен ақпан айының алғашқы жартысында науқастар қатары күрт көбейген. Ақпан айының екінші жартысында біршама кеміген еді, кейінгі кезде қайда арта бастады. Сонда да көрсеткіш құбылмалы. Мәселен, коронавирус пен осыған ұқсас пневмонияны қоса есептегенде дүйсенбі 723,  сейсенбі 763, сәрсенбі 848, бейсенбіде 899 науқас анықталған.

ДенМин-нің ресми мәліметінше, емделіп жатқан 18 789 науқастың 4455-і ауруханада, 14 334-і амбулаторлық бақылауда. Ахуалы нашар 226 науқастың жағдайы қиын, ондағы 52 адамның хәлі өте ауыр. Бұдан өзге 52 сырқат өкпені жасанды желдету аппаратымен тыныстап жатыр.

Былтыр қыс түсер тұста бас мемлекеттік санитар-дәрігер Ерлан Қиясов Қазақстанда кезекті толқынының шарықтау кезеңі қаңтар-ақпан айларына, ал министр Алексей Цой наурыз айының соңына қарай тұспа-тұс келетінін мәлімдеген. Осы айдың басында Цойдың бірінші вице-министрі Марат Шоранов сәуір айында 20 мыңға тарта адам COVID-19 дертін жұқтыруы мүмкін деген.

Жалпы өткен қыста 88 мыңға тарта, жаңа жыл басталғалы Қазақстанда 65 мыңнан аса адамнан ауру анықталған. Тоқсан күнге созылған қыс мезгілінде ауырғандардың 81 мыңнан астамы коронавирус, қалған 6,8 мыңы пневмония пациенттері. Желтоқсан және ақпан айлары аралығындағы барлық көрсеткіштерді мезгілге арналған қорытынды материалдан біле аласыз.

Әзірге вирус таралу қатері жағынан БҚО, Ақмола, Павлодар, Қостанай облыстары, Алматы қаласы мен астана – сары аймақ тұр.

Осыған дейін ақпарат министрлігінің coronavirus2020.kz сайты мен Денсаулық сақтау министрлігінің медиа ресурстарында жарияланған деректер бірнеше айдан бері қате беріліп келгені жайлы материалдар жариялап, ақпарат құралдарына ескерткенбіз.

(!) Пандемия модераторы министрлік тек сенбі-жексенбіде ғана емес, мереке күндері де статистиканы толықтай жүргізуге қауқарсыз. Мәселен, желтоқсан айының 1, 16, 17, 18-і және 19-ына, 1-4, 7 қаңтарға тиесілі деректер еселеп кеміген. Күздің ортасында сол кездегі ДенМин-нің ресми-ерікті өкілі Бағдат Қожахметов екінші толқында демалыс күніне қарамастан статистиканы толық көлемде жүргізуге уәде берген еді. Бірақ іс жүзінде олай болмай шықты. 

Былтыр 13 наурыздан бері COVID-19 инфекциясын жұқтырғандар қатары 217 мыңнан, 1 тамыздан бергі коронавирус пневмониясы 49,5 мыңнан асқан. ДДСҰ дерекқоры мен Ұлттық статистикада Қазақстанда ауырғандар саны 266 мыңға жеткен. Дегенмен Үкімет коронавирус пен оның пневмониясын екі бөлек есептейді.

Пандемия басталғалы жалпы вирус жұққандардың 4497-сі (КВИ+ / U07.1 – 2799, КВИ- / U07.2 – 637, ілеспе аурулардан – 1061) қайтыс болған. Алайда Қазақстан билігі бойынан коронавирус табылса да, басқа аурулардың себебінен қайтыс болды делінген 1061 адамды жалпы статистикаға енгізбейді. Бұған қарсы сарапшылардың сөзіне қарағанда, коронавирустың жанама әсерінен қайтқандардың жартысынан астамының себебі қан айналымы жүйесінің аурулары болғандықтан, оған инфекция дерт қоздырушы фактор ретінде өлімге әкеп соқтырған. Ескерер жайт, министрлік КВИ- статистикасын есепке алмас бұрын жылдағыдан үш есеге өскен пневмонияның 256 мың жағдайынан (қаңтар-шілде аралығындағы) коронавирустық түрін анықтап-зерттеуден бас тартқан. Сарапшылар осы кейсті зерделеген жағдайда шынайы есеп қазіргіден әлдеқайда көп боларын алға тартады. Демек жоғарыдағы сан да нақты болмауы мүмкін.

Қазақстан вирус таралуы бойынша әлемде Worldometers дерекқоры, Джонс Хопкинс университеті және ДДСҰ тізіміндегі 221 ел мен аймақтың арасында 50-орында тұр.

Өткен қыс мезігілінде редакция президент Тоқаев бірнеше рет сынаса да өзгере қоймаған ресми статистикадағы кемшіліктерді түзетуге мұрындық болды. Министрлік өкілдері және есеп жүргізуші мамандарымен апталап айтысуға тура келді.

Осы уақытқа дейін КВИ+ диагнозы бойынша жаңа анықталған науқастар аймақтардағы көрсеткіші күнделікті, ал КВИ- дерегі тек жиынтық мәнде беріліп келген.

Министрлік редакция талабынан кейін статистикадағы кемшілікті мойындап, 26 желтоқсаннан бері ресми хабарламада пневмонияның бір тәулікке кешігіп жарияланатынын растап мерзімін көрсететін болды. 2 ақпаннан коронавирус пневмониясы анықталған науқастардың аймақтардағы көрсеткіші қоса күнделікті беріле бастады. Ал ақпанның 18-і коронавирус пен оның пневмониясынан қайтыс болғандардың есебін күн сайын жариялауға көшті. Бірақ соңғы статистикада мерзім жағынан қайшылық байқалды. Редакция мұны да министрлікке бірнеше мәрте ескертуге мәжбүр болды. Осылайша КВИ+ пен КВИ- дигнозынан көз жұмғандардың тіркелген күні ертеңіне емес, бір күннен кейін жарияланып келгені белгілі болды. Қате дегеніміз – ақпарат құралдары күнделікті статистиканың нақты болмауынан коронавирустан қайтқандарды өткен күнге теліп хабарлауға мәжбүр болған. 26 ақпан осы уақытқа дейін коронавирустың расталған түрінен «өткен күні» қайтыс болды делінген қате ақпарат түзетіліп,  «алдыңғы тәулік» ретінде көрсетіле бастады. Ресми мәліметке сүйенсек, Қазақстан Үкіметі тек ПТР арқылы расталған деректерді уақытылы жариялайды, ал қалған негізгі көрсеткіштер (яғни, пневмонияға шалдыққандар, коронавирус пен пневмониядан қайтыс болған адамдар саны – QT) бір тәулікке кешігіп беріледі. Бұған денсаулық сақтау саласындағы ақпараттық жүйенің жетілмеуі себеп.

Ведомствоаралық комиссияның 5 наурыздағы ресми мәліметіне қарағанда, Қазақстанда 28,4 мың адам коронавирусқа қарсы  ресейлік «Sputnik V» вакцинасын салдырған. Оның 15 мыңы екі дозасын толық алған, қалған бөлігі екінші екпенің уақытын күтіп отыр. Вакцинациядан өтіп жатқандардың басым бөлігі медицина қызметкерлері, сондай-ақ 1,4 мың мұғалім, 174 полицей бар.

"The Qazaq Times"