1 мамыр таң. Өзбекстанның Сырдария облысындағы Сардоба су қоймасындағы бөгет бұзылып сол елдің 22 елді мекенін су басқан. Көрші елдің 70 мың адамы көшірілген. Бұл апаттан өңтістүстегі өз ағайындарымызда аса ауыр зардап шегіп отыр. Түркістан облысының Мақтарал ауданында 845 үй, 3 мектеп, 5 балабақша, 4 медицина ғимараты мен мәдениет үйі және 54,7 км көпір мен жолды су алған. Мұнан өзге 7639 га егістік су астында қалды. Бұл сан әліде өсуі мүмкін. Қазақстан халқы жерлестеріне мүмкіндегінше көмек қолын созып гуманитарлық көмектерін көрсетіп жатыр. Енді осы апат туралы айтып жатқан түрлі пікірлірдің біразына тоқтала кетсек. Бұл біздегі бірінші апат емес. Бұған дейін болған. Су ісіне жауапты құзіретті орындар бүгінге дейін осындай апаттардың тек салдарымен күресіп келеді. Бұған көзі қарақты қауым не дейді. Әуелі осы су ісінің білгірі Ислам Әбішевтің пікірін жеткізген заңгер Абзал Құспанның жазбасын ұсынуды жөн көрдік.

Абзал Құспан, адвокат: Әбішев «Сардоба» су қоймасы заңсыз, сапасыз салынған»

- Құрметті ағайын, оңтүстік өңірде болып жатқан су тасқынына байланысты тергеу изоляторындағы, менің қорғауымдағы Ислам Әбішевпен сөйлестім. Көңіл алаңдатарлық ғана емес, дабыл қағарлық мәліметтермен таныстым. Бірден айта кетейін, ағайын, бұл – Ислам Әбішевті құтқаруға арналған кезекті бір қадам емес. «Оны түрмеден босатыңдар» деген талап та айтылмайды. Болмаса адвокат ретінде өзімнің хайп болсын деген мақсатым жоқ. Елдің қайғысынан хайп жасағаннан құдай сақтасын!..

Ислам Әбішевтің қазіргі айтып отырған әңгімесі – елдің басына төнген қауіп және оның алдын алуға болатыны және болашақта төніп тұрған қандай қауіп бар, сол жайындағы өте өзекті мәселе.

«Сардоба» су қоймасының бөгеті жарылып, соның салдарынан Қазақстанға су кетті деп мәлімдеме тарап жатыр. Ол дұрыс, шындыққа сәйкес келеді. Бірақ, мәселе мынада: осы «Сардоба» су қоймасы 2017 жылы халықаралық шарттарды бұза отырып, заңсыз салынған. Заңсыз салынғанымен қоймай, сапасыз салынған су қоймасы. Ол туралы Ислам Әбішев Су ресурстар комитетін басқарып отырған кезінде бір емес, бірнеше мәрте Қауіпсіздік кеңесіне және Президент әкімшілігіне хаттар жазғанын айтты. Заңсыз салып жатыр, сапасы көңіл алаңдатарлық деп айтқан. Ол кезде оған құлақ түрген билік болмағанын, ол хаттар айналып өзіне келгенін айтты. Әрине ол хаттардың көшірмесін де, түпнұсқасын да сіздерге ұсына алмаймын. Біріншіден, Ислам Әбішев түрмеде. Екіншіден, ол хаттар «құпия» деген грифпен жазылған... Енді оның заңсыздығы неде? «РРРССАМ» деген өте күрделі аббревиатура – «Регулирование русла реки Сырдарий северней части Аральского моря» деп аталады. Сырдария – трансшекаралық өзен. Міне, осы екі жақты мемлекеттік келісімнің талаптарына сәйкес, Өзбекстан жағы да, Қазақстан жағы да кез келген өзеннің өзіне қатысты, пайдалануға қатысты немесе өзеннің айналасындағы құрылыстарға байланысты өзара бірлескен іс-шаралар жасауға міндеттеледі. Бір-бірінің келісімінсіз екінші мемлекет жұмыс жасауға тиісті емес.

Ислам Әбішев «2004 жылы Қазақстанның бастамасымен, Сырдария өзен сағасын өзгерту мәселесінде Өзбекстанмен келісімге келіп, құрылыс бастадық» дейді. Бірінші фазасын аяқтаған екен. Екінші фазасына келген кезде, осы жұмыстарды жалғастыруға Өзбекстанның рұқсаты болмағандықтан, Қазақстан жағы ол құрылысты жүргізе алмай қалған екен. Яғни, Қазақстан жағы екі жақтың келісімінің талаптарын сақтаған, халықаралық шарттардың, оның ішінде «Хельсенки» су келісімі бар, БҰҰ бекіткен шарттар бар, ол екі бірдей халықаралық нормалардың барлығына екі елдің қолы қойылған. Яғни, екі ел де сөзсіз бағынуға, талаптарды орындауға міндетті. Одан бөлек, жаңағы айтқан «РРРССАМ» деген екі жақты келісім бар. Яғни, Қазақстан жағы заң талаптарын бұзбай сақтаған.

Ал 2017 жылы Қазақстан Республикасының келісімін алмастан, тіпті сұрамастан, Өзбекстан жағы осы «Сардоба» су қоймасын салып тастаған. Бұл не деген сұмдық? ...Өзбекстан Қазақстан жағына талапты орындатады, ал өзі ойына не келсе, соны істейді. Сонда біз қандай ел, қандай мемлекет болғанымыз? «Сардоба» су қоймасы заңсыз, сапасыз салынғанын білдік дейді Ислам Әбішев. Қалай білдіңіздер десек, СССР кезінен бері сол салада жұмыс істеген мамандармен, сол жақтағы адамдармен байланысымыз бар еді дейді. Сол арқылы білген. Өте аз уақыттың ішінде тез-тез, сапасыз материалдармен жылдам түрде салынғанға ұқсайды. Міне, соның зардабын қазір Қазақстан тартып отыр.

Кезінде Өзбекстан шекарашылары мал айдап жүріп шекарадан байқамай өтіп кеткен Қазақстан азаматын заңсыз атып өлтіргенін де білеміз. Оның кейінгі тағдырын білмеймін, мен мүмкін ақпаратты көзім шалмай қалған шығар, менің ойымша Қазақстан өзінің азаматының құқын сұрап, аяғына дейін істі қадағалауына алып, сол Өзбекстанның шекарашылары сотталды ма, қазақ отбасына компенсация алынды ма, ол туралы ақпаратты білмеймін. Бірақ, Қазақстанның осындай мәселелерге келгенде салғырттық танытатынына сенімдімін. Бұл болған жағдай.

Егер Ислам Әбішев бұның бәрін білген болса, неғып айтпады, неге елдің алдында көтермеді дейтін боларсыздар. Айта кетейін, 2019 жылдың желтоқсан айында менің қолқа салуыммен, Ислам Әбішев мақала жазды, «abai.kz» порталында «Ислам Әбішев: Су саласындағы қауіпсіздік өте маңызды» деген атпен жарияланған. Сол мақалада Қазақстандағы су қауіпсіздігі мәселесі, соның ішінде дәл осы Сырдария өзеніне байланысты трансшекаралық мәселелер де, трансшекаралық аймақтардағы қауіпсіздік мәселелері де сөз болды. Ол кезде «Шардара», «Көксарай» су қоймалары және Астанадағы «Астана» су қоймасына қатысты мәселелерді жазды. Онда сандық ақпараттар келтірілген. Мына сандарға назар аударыңыздар:

«Сардоба» су қоймасының су жинау мүмкіндігі 900 миллион текше метр болатын болса, «Шардара» су қоймасының су жинау мүмкіндігі 5 миллиард 200 миллион текше метр. «Шардара» су қоймасы өте үлкен. Мақалада да жазылады, жаңа скайппен сөйлескенде де шырылдап тұрып айтып жатыр, «Абзал, сен үкіметке жеткіз» дейді, менің үкіметке жеткізетін мүмкіндігім жоқ. Сіздер арқылы, журналистер болатын болса, басқа да бір жаны ашитын азаматтар болатын болса, солар арқылы үкіметке жеткізуді мақсат етіп отырмын. «Сардоба» су қоймасы заңсыз, сапасыз, Өзбекстан жағының сапасыз салғаны өз алдына, «Шардара» су қоймасының техникалық жағдайы мәз емес, қауіп төніп тұр деп дабыл қағып жатыр Ислам Әбішев.
Енді мынаған назар аударыңыздар, Әбішев Су ресурстар комитетінде қызметте жүргенде бұл туралы талай техникалық-экономикалық негіздеме жасап, үкіметке ұсынған. Үкіметте қабылданбай, ақыры кабинеттердің бірінде жоғалды дейді. Сонда «Шардара» су қоймасының бұдан бұрынғы жасалған (белгілі бір мерзімде жасалатын жөндеу) жұмыстары кезінде жөндеу жұмыстарының сапасыз екендігі туралы мәселе көтерген. Ол хаттар қызметтік хаттарда бар екенін айтты. Су ресурстар комитетін басқарып отырған кезінде «Сардоба» су қоймасы жайлы бір емес, бірнеше мәрте Қауіпсіздік кеңесіне және Президент әкімшілігіне жазған хаттары өзіне қайтып келген. Су ресурстар комитетінің төрағасы ретінде Өзбекстан Республикасының үкіметіне ықпал ете алмаймын ғой дейді. Қазақстанның Үкіметі бар, Сыртқы Істер Министрлігі бар, Президент Әкімшілігі бар. Осылар айналысатын шаруа еді дейді.

«Шардара» су қоймасы кезінде Ислам Әбішев ұсынған техникалық-экономикалық негіздеме негізінде қайтадан күрделі жөндеуден өтпесе, ол өзінен 110 км төменде жатқан «Көксарай» су қоймасын қосып алып кетеді дейді. 3 миллиард текше метр су жиналатын ол да үлкен су қоймасы. Екеуін қосқан кезде шамамен 8 миллиард 200 миллион текше метр су болады. Енді қараңыздар, «Қызылағаш» су қоймасында бар-жоғы 30 миллион текше метр су жиналатын еді дейді. Осыдан он жыл бұрын «Қызылағаш» су қоймасында қараусыз қалғанның салдарынан бөгет бұзылып, су тасқынынан 45 адам қайтыс болды, бір ауылды екі сағаттың ішінде тып-типыл жоқ қылып жіберді. Ал «Шардара» су қоймасы мен «Көксарай» су қоймасын қосқандағы судың көлемі «Қызылағаш» су қоймасынан 273 есеге дейін көп. Егер Ислам Әбішевтің айтуымен «Шардара» су қоймасы дұрысталмайтын болса, оның салдары 273 есеге дейін зор болмақ. Ол тығыз орналасқан оңтүстік аймақтармен қосып, Қызылорданың Аралына дейін су шайып кетеді деп түрмеде жатқанымен шырылдап, дабыл қағып жатыр.

...Ислам Әбішевтің маман ретінде айтқан мәлімдемесі маңызды. 2019 жылдың қараша айында ... «Сардобаны» да айтып еді. Қазақстанға үлкен мәселе болады, трансшкаралық аймақтарда мәселе көп деп айтып еді.

Айтқаны айдай келіп отыр.

Әбішевтің тағы бір сәлемі – кеңес кезінде оқыған, жұмыс істеген су инженері мамандары өте аз қалды. Қанша дегенмен, кеңес кезіндегі білім терең, жан-жақты еді. Сол мамандарды, ғалымдарды мұндай іске жұмылдыру өте маңызды екенін айтып отыр.

Тағы қайталап айтамын, ол кісі қызметте отырған кезде үкіметке хат жазған, мәселе көтерген, алайда жауап алмаған. Енді маманның бұл дабылы да естілмей қалмаса екен деген тілек. Сондықтан, бір ғана өтінішім бар, Ислам Әбішевтің мен арқылы көтеріп отырған мәселесін ең жоғарғы деңгейге дейін жеткізсеңіздер екен. «Халық талап етсе, хан тағынан түсіп, түйесін сояды» дейді. Ең жоғарғы Президентке дейін жетсе екен тілек бар. Әйтпесе, кеш қалып қоюымыз әбден мүмкін...

Белгілі журналист Сәкен Сыбанбай: «БҰЛ - ТАБИҒИ АПАТ ЕМЕС
Өзбекстандық құқық қорғаушы және жобаларды басқару бойынша сарапшы Жавоҳир Шукуров өзінің «Суы қашқан Сардоба: соқпаған жел мен жаумаған жаңбыр кінәлі ме?» атты мақаласында апат болатын күндері Өзбекстанның аталмыш су қоймасы орналасқан Сырдария облысында жойқын дауылдың да, нөсер жауынның да болмағанын айтады.
«29 сәуір күні Ташкент, Жызақ, Самарқанд және Сырдария облыстарында күндіз 20-25 граудс ыстық, түнде 17-23 градус жылы болған. Аталған аймақтардың кей жерлерінде аз-кем жаңбыр жауған. Бірақ қатты жаңбыр немесе дауыл болмаған. 30 сәуір күні аталған төрт облыста да жауын жаумаған. Түнде +12-17, күндіз +23-28 градус болған. 1 мамыр күні де ауа райы сәуірдің соңғы күніндегідей болған. Рас, «Узгидромет» Сырдария облысында 1-2 мамыр күндері жауын-шашын болатынын хабарлаған еді. Бірақ жергілікті тұрғындар дәл ондай қатты дауылдың да, нөсер жауынның да бола қоймағанын айтады.
Тіпті жаңбыр құйып, қатты жел соқсын-ақ делік. Егер бөгет сол жаңбыр мен желге шыдамай бұзылса, демек, оның жобалануында, тәуекел етілуінде, салынуында, тіпті біткен соң қабылдануында бір кінәрат бар деген сөз...» деп жазады ол.

ДЕМЕК, "БҰЛ ТАБИҒИ АПАТ ҚОЙ" ДЕГЕН СӨЗДІ ҚОЙЫҢЫЗДАР...» деп жазды.

Жазушы Нұрлыбек Саматұлы:  «КӨКСАРАЙ» ДА ТАЛАН-ТАРАЖДАН АМАН ЕМЕС...»

Өзбекстандағы «Озодлик» (Азаттық) сайтының тілшісі Сардоба су қоймасының бұзылуына жемқорлық себеп болған депті. Дәлел ретінде аты-жөндерін айтпаған бірнеше адамның әңгімесін келтіріпті. Аты-жөнін айтсын, айтпасын, бұл енді шындық. Бұндай жемқорлықтың көкесі өзімізде де бар. «Көксарайға» байланысты бір әңгіме есіме түсіп кеткені.

Кезінде «Көксарай» су қоймасының салынуына бірқатар эколог мамандар қарсы болыпты. Олардың айтуынша, «Көксарай» салынса, өңірдің экологиясы бұзылады екен. Бірақ су қоймасын салғаннан табиғатқа қандай нұсқан келетінін мен еш түсіне алмай-ақ қойған едім. Мүмкін бір білмегенім бар шығар деп ойлап, біледі-ау деген адамдардан ал кеп сұрайын, «Көксарайдан» табиғатқа келер қандай зиян деп. Ешкім ештеңе айтпайды. «Көксарай» туралы мақалаларға шұқшиямын, ештеңе жоқ.

Бір күні сол «Көксарай» маңындағы ауылда тұратын Бауыржан атты жігітпен әңгімелесіп қалдым. «Көксарай» туралы сұрадым. «Су қоймасы табиғатқа зиян дейді, сол рас па?» деп. Ол да су қоймасының табиғатқа қаншалықты зиян екенін айта алмады.

– Мен бір зиянын айтайын, – деді бір кезде Бауыржан есіне әлдене түсіп, – «Көксарай» сапасыз салынған. Бір күндері болмаса, бір күндері су жарып кетуі мүмкін. Жарып кетсе, әне, зиянның көкесі.

– Сапасыз салынғанын қайдан білесің? – деймін ғой.

– Білем. Дамбаға бетон құйғанда арасына шірімейтін темір тор салады екен. Сол тордың біразын құрылысшылар сатып жіберіпті. Біздің ауылдың адамдары да сатып алып, қойға қора жасаған.

Кешегі Сордобаның бұзылуының себебі жемқорлық, талан-таражға салу деген әңгімеден соң менің ойыма да «Көксарай» туралы сол әңгіме орала кетті. Бетон арасына салынуға тиісті темір тордың жең ұшынан жалғасып сатылып кетуі мәселенің бергі жағы ғой. Біздің жігіттер де жеген шығар-ақ, опырып.

Әйтеуір Құдай сақтасын! Одан басқа біздің қолдан не келеді?» деген пікірі жоғардағы Әбішевтың айтқанын айғақтағандай.

Апат айтып келмейді. Бұл күндерде өтіп кетер. Өзбек президенті Шавкат Мирзияев мырза осы апатқа байланысты барлық кінәлілер заң алдында жауап береді "Біз халықаралық сарапшыларды шақырып, бөгеттің құрылысын тексереміз. Сол кезде бәрі белгілі болады", -деп отыр. Одан бізге қанша қайыр болатыны белгісіз. Қалай болғанда да осы ащы сабақтан өзіміздегі басқада су қоймаларының жайына көбірек көңіл бөлсе дегенді айтқымыз келеді.

"The Qazaq Times"