Түркия Евфраттың шығысында әскери операция бастау алдында тұр. Фото: Анадолы.

Түркия қарулы күштері ресми мәлімдеме жасап, Сүрияның солтүстік-шығыс аумағында әскери операция дайындығы жасалып болғанын хабарлады. Мәлімдемеде, қарулы операция Евфрат өзенінің шығыс жағалауында басталатыны айтылған.

Түркия Қорғаныс министрлігі таратқан мәлімдемеде операцияның мақсаты туралы: «Аймақтық қауіпсіздікті қамтамасыз ету және сүриялық босқындарды бейбіт аймаққа орналастыру мақсатында қарулы операциялар жүргізіледі», – делінген.

Сондай-ақ, хабарламада: «Түрік қарулы күштері Түркияның қауіпсіздігі, 82 млн халықтың амандығы үшін елімізге қауіп төндіретін барлық террорлық топтарға қарсы күреседі», – делінеді.

Түркия аталған операцияны бастаудан бұрын Ресей және Иран басшыларының қатысуымен «Үштік саммитін» өткізді. Сондай-ақ, Сүрия жеріндегі қарулы әрекеттер турасында АҚШ үкіметімен де келісімдер алып барған. Мәскеу мен Уашингтон тарабы Түркияның қарулы әрекеттеріне қарсылық білдірген жоқ.

“The Qazaq Times”