Ресей президенті Владимир Путин мен Үндістан премьер-министрі Нарендра Моди.

Ресей мен Үндістан құны 5 миллиард долларды құрайтын келісімге келді.

Қазан айының 5-і күні Дели қаласында Ресей президенті Владимир Путин мен Үндістан премьер-министрі Нарендра Моди Ресейдің "С-400" зымыран жүйесін Үндістанға сатуға байланысты құжатына қол қойды. Алдына ала болжам бойынша, келісім құны 5 миллиард долларды құраған.

Ресей БАҚ өкілдері жарыса жазып жатқан бұл ақпаратты Путиннің баспасөз хатшысы Дмитрий Песков та растады. Ол аталмыш мәселеге байланысты қойылған журналистер сауалына: «Иә, Делиде келісімге қол қойылды» - деп жауап берген.

Естеріңізге салайық, осыдан біраз уақыт бұрын Қытай Ресейден "С-400" зымыран жүйесін сатып алған. Осыдан кейін АҚШ Қытайға санкция салған.

Ресейдің "ВКО Алмаз-Антей" концерны құрастыратын "С-400" зымыран жүйесі 400 шақырым қашықтықтағы аэродинамикалық нысандарды және 60 шақырым қашықтықтағы баллистикалық нысандардың көзін жоюға қауқарлы.

"The Qazaq Times"