Сүрия жеріндегі ресейлік s-300. Фото: Missile Threat

Сейсенбі күні Ресейдің Ұлттық қауіпсіздік кеңесінің отырысы өтіп, жиналыста сол елдің қорғаныс министрі Сергей Шойгу S-300 зымыран қорғаныс жүйелерінің Сүрияға өткеріп беретінін мәлімдеген болатын.

Осыған байланысты АҚШ Мемлекеттік департаменті арнайы мәлімдеме жасап, алаңдаушылық танытты. Мемлекеттік департаменттің ресми өкілі Хизер Науерт бір күн бұрын жасаған мәлімдемесінде: «Ресейлік S-300 зымыран қорғаныс құрылғыларының Сүрияда орнатылуы бұл елдегі тұрақсыздықты тіпті де өршіте түседі», – деді.

Шойгудың мәлімдемесінен S-300 зымыран қорғаныс жүйесінен тыс, осыған дейін ресейлік әскери базаларды қорғап келген арнайы қорғаныс құрылғыларының да Сүрия үкіметіне берілгені мәлім болды.

Мәліметтерге қарағанда, Сүрияның арнайы мамандар тобы Мәскеуге барып, S-300 зымыран қорғаныс жүйесін пайдаланудың қысқа мерзімдік үйренуін бастап кеткен. Үш айдан кейін сүриялық әскери мамандар ресейлік зымыран қорғаныс жүйесін пайдалануға толықтай дайын болмақ.

“The Qazaq Times”