Қазақстанда ең ірі жылыжай кешені осы жылдың жарты жылында 4 мың тоннаға жуық өнім алды. Гектарына 300-350 центнерден өнім алып отырған «Аделя» жылыжайы 16 гектар жерге қызынақ пен қияр егіп, жылына екі рет өнім алған, деп хабарлайды ОҚО әкімдігінің баспасөз қызметі. Жылыжай Ордабасы ауданы, Бадам ауылында орналасқан.

Жылыжайда француз компаниясының заманауи қондырғылары орнатылған. Мұнда жылытудан бастап тамшылатып суаруға дейінгі барлық процесс компьютермен бақыланады.

Кәсіпкерлердің айтуынша, мұндағы өсірілетін көкөністер экологиялық таза өнім. Оларды өсіруде қолданылатын технология су мен тыңайтқыштарды және басқа да ресурстарды үнемдеуге мүмкіндік береді. Жиналған өнімнің басым бөлігі Ресейге экспортталса, қалғаны Қазақстанның Алматы, Астана қалаларына жіберіледі.

Жобаны «ҚазАгроҚаржы» акционерлік қоғамы қаржыландырған. Аталмыш ұйым 2011 жылы 440 миллион теңге көлемінде жеңілдетілген несие берсе, 2013 жылы 2,2 миллиард теңге көлемінде қаржы бөлген.

Жалпы облыс аумағындағы жылыжайдың жалпы көлемі 900 гектардан асады. Бұл - Қазақстандағы жылыжай шаруашылығының шамамен 80 пайызын құрап отыр.

“The Qazaq Times”