"Талибан" тұрақты армия құрмақ. Фото: Financial Times

Ауғанстанда уақытша үкімет арқылы билік ұстап тұрған «Талибан» мәлімдеме таратып, жақын арада тұрақты қарулы күштердің құрылатынын мәлімдеді.

Уақытша үкімет құрамында Бас штаб төрағасының қызметін атқарып тұрған Кари Фасихуддин ресми мәлімдеме жасап, тәліптердің тұрақты армия құру туралы жоспарларымен бөлісті. Кабулда өткен баспасөз жиынында Ауғанстанның тұрақты қарулы күштерін жасақтау жоспарының көп ұзамай жүзеге асырылатынын жеткізген.

Бұнымен қоса Фасихуддин елде этникалық бөлініске бастаған және қарсылыққа өткен күштерге қарсы қатаң соққы берілетінін айтқан. Атын атап, түсін түстемесе де бұл арада Фасихуддин Панжшер шатқалындағы «Ұлттық қарсылық шебін» меңзеп отырғаны белгілі.

Тәліптер бұдан он күн бұрын Панжшерді өз бақылауымызға алдық деп мәлімдеген. Алайда, одан кейін де «Ұлттық қарсылық шебі» қарулы күштері тәліптермен шайқасты. Тараптар бір-біріне қарама-қайшы да мәлімдеме жасап жатқан болатын.

The Qazaq Times