Анкара. Алтындаг ауданы. Фото: Әлеуметтік желілерден.

Түркияның орталық қаласында жергілікті тұрғындар мен сүриялық босқындар арасында жанжал туылды. Анкаралық ондаған тұрғын сириялық босқындарға тән дүкендер мен көліктерді қиратқан. Жанжал түркиялық және сүриялық жастардың ортасындағы төбелестен басталған. Төбелесте 18 жастағы түрік азаматы пышақ жарақатынан қаза тапқан.

Әлеуметтік желіге тараған суреттер мен видеолардан айғай-сүренмен қостаған жергілікті тұрғындардың полиция қоршауын бұзып өтіп, көліктер мен дүкендерді қиратқаны көрінеді. Кейбір дүкендер мен үйлердің терезелеріне тас лақтырып жатқанын да көруге болады.

«Рейтердің» хабарына қарағанда полиция жанжалды тоқтату үшін әуеге оқ атқан. Жаппай тәртіпсіздікке қатысқан 76 адам қамауға алынған. Анкараның жанжал болған Алтындаг ауданында дүкендер жабылып, арнайы күзет тобы қойылған.

Түркияда Сүриядан барған 3,7 миллионнан астам босқын өмір сүреді. Олардың тек 10 пайызы ғана елдің оңтүстік шығысындағы арнайы лагерлерде тұрады. Ал, қалғаны өз бетінше елдің әр өңірін мекендеп кеткен.

The Qazaq Times