Көктемгі карантиннен кейін Алматы іргесінде коронавирустан қайтыс болғандарды жерлейтін зират басында. 25 мымыр 2020 жыл. Алматы облысы. Фото: Азаттық радиосы

Қазақстанда өткен тәулікте 2711 адамның анализінен коронавирус анықталған. Ал 5 шілдеде 27 адам пневмонияның коронавирусқа ұқсас түріне шалдыққан. Бұл ақпаратты денсаулық сақтау министрлігі хабарлады. 

Дүйсенбі күні елде коронавируспен байланысты 30 адам өлімі тіркелген: 27 адам – коронавирустан, 3 адам – коронавирус пневмониясынан қайтыс болды деп айтылады.

Елде "үндістандық штамның" тарағаны жайлы ақпарат шыққалы бері коронавирус жұқтырғандар үздіксіз көбейіп келе жатыр. Ресми мәлімет бойынша, 2020 жылдың наурыз айынан бері 442 291 адамның коронавирус тесті оң шыққан. Індет басталғалы бері коронавирустан – 4516 адам, коронавирус пневмониясынан 3470 адам қайтыс болған.

Қазір елде Астана, Алматы, Шымкент қалалары, Ақмола, Атырау, БҚО, Қарағанды, Маңғыстау және Павлодар облыстары қаупі көп "қызыл аймақта", Ақтөбе, Қостанай, СҚО, Қызылорда, Алматы, Жамбыл облыстары вирус тарауы жағынан орташа "сары аймақта" тұр. Қалған облыстар "жасыл аймақта".

Министрліктің дерегінше, 7 шілдеге дейін 3 млн 906 мың адам коронавирусқа қарсы екпенің бір дозасын; 2 млн 236 мың адам екі дозасын да алған. Елде ресейлік "Спутник V", қазақстандық QazVac, HayatVax (БАӘ елінде дайындалған Қытайдың екпесі), қытайлық Coronavac екпесін салып жатыр.

"The Qazaq Times"