Испанияда коронавирустың үшінші толқыны басталып, жан сақтау бөліміндегі науқастардың 40%-ы осы дертпен күресіп жатыр.

Карантин талаптары қатаңдатылған Испанияның өптеген қаласында індетке қатсы шектеулер күшейтілді. Мәселен, Валенсияда отбасынан өзге адамдармен кездесуге рұқсат жоқ. Ал ел астанасы – Мадридте коменданттық сағат жарияланып, түнде үйден шығуға тыйым салынды.

Жаппай вакцинациялау басталған елдер «COVID-төлқұжат» енгізу мәселесін талқыға алған. Вакцина қабылдады деген құжатты енгізуге Дүниежүзілік денсаулық сақтау ұйымы қарсылық білдіргенмен, Еуроодақ елдері мен Ресей бұл мәселені қарастырып жатыр.

Мәселен, Испания билігі бастаманы қолдайтынын жеткізді. Өйткені ел экономикасы туризмге тәуелді. Былтыр Испанияның саяхат саласы соңғы жарты ғасырдағы ең ауыр жылға тап болды. Пиреней түбегіне келген шетелдік саяхатшылар саны 80%-ға азайған.

Грекия билігі де осындай сертификат енгізу бастамасын қолдап отыр. Себебі эллада елінде де туризмнің экономикадағы үлесі жоғары. Қолдаушылар қатарында Польша мен Дания да бар. Еуроодақтағы Франция мен Румыния билігі керісінше, бұл идеяны құптамайтындарын айтқан.

Аталған құжат вакцинациялау туралы анықтаманы алмастырады. Қолында тиісті құжаты бар адамның шетелге шығуы жеңілдеп, өзге елден оралғанда карантинде отырмайды.

"The Qazaq Times"