Делиде саудагерлер Қытаймен шекарада болған қақтығысқа наразылық білдіріп, Қытай тауарларын өртеді. Үндістан биыл жыл соңына дейін Қытайдан импортталатын тауар көлемін 13,5 миллиард долларға қысқартпақ.

The Indian Express басылымының хабарлауынша, «Қытайға бойкот» шарасын Үндістан саудагерлерінің кәсіпқой бірлестігі ұйымдастырған. Шерушілер биліктен Қытайдан әкелінетін барлық тауарға бойкот жариялап, осы елдің мемлекеттік компанияларымен жасалған келісімшарттарды жоюға шақырды.

19 маусымда Ұнжістанның бірқатар қалаларында Қытай билігіне қарсы наразылық шерулері өткен. Шерушілер Қытай туына оралған табытты жағып, суға лақтырды. Нью-Делиде бірнеше ардагер Қытай елшілігінің алдына жиналып наразылығын білдірді.

17 маусымда Қытай мен Үндістан шекарасында атыс болып, 20 сарбаз оққа ұшқан. Батыс басылымдары бұл соңғы 45 жыл ішінде орын алған алғашқы қарулы қақтығыс деп бағалады. Үнді армиясының мәлімдемесінде екі елдің қорғаныс министрлік өкілдері шиеленісті реттеу мақсатында кездесу өткізеді делінген. Қытай тарапы мұндай кездесу өткізіліп жатқанын растады және Үндістанды «мемлекеттік шекараны бұзды» деп айыптады. Өз кезегінде Үндістанның Сыртқы істер министрлігі Қытайға өткен аптада жасалған шекара сызығы туралы келісімді бұзды деп айыптап отыр. Үнді СІМ мәлімдемесіне сәйкес, «қиян-кескі қақтығыс Қытай тарапының өңірдегі шекаралық бақылауды өзгертпек болғаны үшін орын алған».

"The Qazaq Times*