Жазушы Ырысбек Дәбей және "Жас Алаш" газетінің бас редакторы Инга Иманбай. Фото: Ы. Дәбейдің "ФБ" парақшасынан.

Жақында ғана бас редакторы алмасқан «Жас Алаш» газетінің редакциясында тағы да кадрлық жаңарулар болып жатыр. Ғасырлық тарихы бар әрі республикалық тәуелсіз басылым ретінде аталатын газеттегі бұндай өзгерістер көзқарақты оқырманын елең еткізгені белгілі. Ал, бүгін жазушы, белгілі журналист Ырысбек Дәбей «Жас Алаш» газеті редакторының орынбасары болды.

Ырысбек Дәбей бұл туралы мәліметті өзінің әлеуметтік желідегі парақшасында растаған. Ол «Фейсбук» парақшасында Инга Иманбай «көтерген жүктің бір жағын демесуге шешім қабылдағанын» жазған болатын.

Ырысбек Дәбей бұған дейін әдебиет оқырмандарына «Әкелеріміз айтатын әңгіме», «Мөлтіл», «Жылқы атылған жаз» қатарлы бірқатар сүбелі туындыларын ұсынған болатын. 2011 жылғы Жаңаөзен оқиғасын арқау еткен «Қоңыз» кітабы былтыр желтоқсан айында тұсауы кесіліп оқырманға жол тартқан болатын. Тәуелсіз жылдарымыздың қара дағы іспетті тарихи оқиғаны арқау еткен шығарма зиялы қауым ортасында өз алқауын да алған.

Қаламгер, белгілі журналист әріптесіміз Ырысбек Дәбейді жаңа орнымен құттықтай отырып, қазақ ақпарат кеңістігінде орыны бөлек басылымның ұжымына шығармашылық табыстар тілейміз!

“The Qazaq Times”