Украина президенті Владимир Зеленский. Фото. https://politeka.net

Зеленскийдің командасы ұсынған реформа жүзеге асқан жағдайда тек Украина азаматтары ғана жерді сатып ала алады. Бұл туралы Украина президенті Владимир Зеленский мәлімдеді.

«Жер украиндарға тиесілі. Үкіметпен ұсынылатын үлгілерде жерді тек украиндық азаматтар немесе украиндық компаниялар ғана сатып ала алады», – деді ол. Сондай-ақ президент Үкімет алдына 1 қазанға дейін осы реформаның жобасын әзірлеу міндетін қойды.

Украинадан нарықтық жағдайларда жер айналымын заңдастыруды Дүниежүзілік банк пен Халықаралық валюта қоры (ХВҚ) талап етеді. Украина мен ХВҚ арасындағы ынтымақтастық туралы меморандумда жаңа несиелік бағдарлама аясында Киев пен Дүниежүзілік банктің сарапшылары ауыл шаруашылығы мақсатындағы жер нарығын енгізуді көздейтін заң жобасын әзірледі. Меморандум авторларының айтуынша, алдағы уақыттарда Украинада жер реформасын жүргізудің артықшылығын түсіндіретін ақпараттық науқан басталды.

Қазір Украинада ауыл шаруашылығы мақсатындағы жерді сатуға мораторий жарияланған.

"The Qazaq Times"