Бірқатар еуропалық жоғары оқу орындарының оқытушы-профессорлары Еуропа Комиссиясына ашық хат жолдап, ЕО-ға мүше елдерден Израильге қару-жарақ сату және сатып алу әрекеттерін тоқтатуды талап еткен.

Түркиялық «Анадолы» және Иранның IRNA ақпараттық агенттіктерінің хабарына қарағанда, ашық хатқа Еуропа университеттерінің оқытушыларын мен зерттеушілерінен 150 адам қол қойған. Олар Еуропа Одағы мүше елдерден Израильге қару-жарақ сату және сатып алу әрекетін, бірлескен зерттеу жобаларын тоқтатуды талап еткен.

Ашық хатта Израильдің адам құқықтарын ашық-әшкере бұзып отырғанын айыптаған. Сондай-ақ, Еуропа азаматтарының зерттеулер үшін салық төлейтінін, сондықтан Еуропа елдерінің «Horizon Europe» ғылыми зерттеу жобасына Израильді қатыстырмау талабын қойған.

«Израильдің бұл жобаға қатысуы еуропалықтардың құндылықтарына қайшы келеді», – делінген ашық хатта. Дегенмен, азаматтардың қарсылығына қарамастан АҚШ пен Еуропа елдерінің Израиль мен қарым-қатынасы тығыз екені белгілі.

“The Qazaq Times”