Бүгін Қазақстан жұртшылығы қуғын-сүргін және ашаршылық құрбандарын еске алуда.

31 мамыр күні Қазақстан халқы 1918-1933 жылдары болған ашаршылық пен 1937-1938 жылдары болған репрессия құрбандарын еске алуда.  1997 жылы Қазақстанның тұңғыш президенті Нұрсұлтан Назарбаев дәл осы күнді «қуғын-сүргін құрбандарын еске алу күні» деп жариялаған.

1918-1933 жылдар аралығында Қазақстанда ашаршылықтан 3 миллионнан астам адам көз жұмған. Ал 1937-1938 жылдары қылышынан қаны тамған Кеңестік жүйенің «Үлкен террор» операциясы салдарынан қазақ халқының Ахмет Байтұрсынұлы, Әлихан Бөкейханов, Мағжан Жұмабаев сынды біртуар азаматтары, ұл қаймақтары опат болды.

Айта кететін бір жайт, Қазақстанмен тағдырлас Украина елі қуғын-сүргін және ашаршылық құрбандарын 19 мамыр күні еске алады. Бірақ олар украин ұлтының басынан өткен зұлматты геноцид деп танып, халықаралық дәрежеде мойындатуға күш салуда.

"The Qazaq Times"