Фото: nts.kg

Экс-президент, ҚСДП лидері Алмазбек Атамбаев Қырғызстанға қайтып келеді. Осылай деп Социал-демократиялық партияның ресми өкілі Құндыз Жолдыбаева мәлімдеді.

Ол Атамбаевтың елден қашып кетті деген алып-қашпа сөздерді теріске шығарды. «Ол қайтып келеді ме, келмейді ме деген тақырыпта пікір-таласуға негіз жоқ. Сіздер Алмазбек Атамбаевтың ұстанымын жақсы білесіздер. Ол Қырғызстаннан ешқайда кетпейді. Оның елден кетуіне де негіз жоқ. Ол Бішкекке 28 қазанда қайтып келеді», - деді Жолдыбаева.

Алмазбек Атамбаев Ресейге 22 қазанда ұшып кеткен. ҚСДП оның 22-23 қазанда Санкт-Петербургте болатынын, ол жақтан туған ағасының жесірін жерлеу рәсіміне қатысатынын жеткізді. Мұнан бөлек Атамбаев 24-27 қазанда Мәскеуде өтетін азиялық саяси партиялардың халықаралық конференциясына қатысады.

"The Qazaq Times"