Фото: stratejikortak.com

Израиль премьер-министрі Биньямин Нетаньяху егер Иран Қызыл теңізден Үнді мұхитына шығатын Баб-әл-Мандеб бұғазын жауып тастайтын болса, Иранға қарсы соғыс ашуға дайын екенін ескертті. "Егер Иран Баб-әл-Мандеб бұғазын жауып тастайтын болса, бұның алдын алу үшін жасақталған халықаралық одақ қарсылығына ұшырайтынын білсін. Ал, бұл одақ израильдік қарулы күштердің барлық түрінен құралған ", - деген Б.Нетаньяхудың сөзін де жазған "20minutes.fr" агенттігі.

Еске салайық, Баб-әл-Мандеб бұғазы арқылы жеткізілетін мұнай тасымалы бұдан бұрын да Йемендегі соғысқа бола Сауд-Арабиясы тоқтатқан еді. Бұдан бұрын, Қызыл теңіз бен оның бұғаздарына тікелей шығатын мүмкіндігі жоқ Иранның қолдауына ие йемендік көтерілісші-хүситтер бұғаз арқылы өтіп бара жатқан саудиялық екі танкерге шабуыл жасаған еді. Шабуыл салдарынан кемелердің бірі зақымданған болатын. Дереу осы оқиғадан кейін Сауд-Арабия билігі бұғаз арқылы жеткізілетін мұнай тасымалын тоқтататынын мәлімдеген еді. Енді, өз мұнайын экспорттауда кедергіге ұшыраса Иран Парсы шығанағы мен Аравия теңізін біріктіретін Ормуз бұғазын жауып тастайтынын ескертуде.

“The Qazaq Times”