Путин тікелей эфирде көрген бұл суретке: "Мына жол белгісі дұрыс қойылмаған", – деді. Фото: BBC.

Ресейде наурыз айындағы сайлаудан бұрын бағалар тұрақты күйде тұрған. Сайлау өте салып Ресейдің 75 облысында бензин бағасы өсе бастады. Мамыр айына жеткенде бағаның өсуі 5,6 пайызға дейін жетті. Соңғы бір аптада Ресейдің оннан астам қаласында жанармайдың қымбаттауына қарсы наразылық шерулері өтуде.

Ал, кеше РФ президенті Владимир Путин бұл мәселелерге байланысты тікелей эфирде жауап беруге мәжбүр болды. Алайда тікелей эфирде жауап беру кезінде бағаның өсуіне қарсы ереуілдер туралы сөз болған жоқ. Президент Путин ел азаматтарының «Жанармайдың бір литрі 45 рубль болды, қашанға дейін шыдаймыз?» деген сұрағына: «Бұл энергетика ресурстарының дұрыс басқарылмауынан келіп шықты. Әлемде мұнай бағасы өсті. Шикі мұнайды экспорттау пайдалы болып қалды. Сондықтан баға өсіп жатыр», – деп жауап берді.

Ресей президенті азаматтардың бұл сұрағына жауап беру үшін тікелей эфирге энергетика министрі Александр Новакты да шақырды. Ол бағалардың өсуі тоқтағанын және экспорт көлемін тежеп, бағаны тұрақтандыру үшін экспортқа деген мемлекеттік салықты жоғарлату ұсынысын ортаға қойды. Ал президент Путин бұндай заң жобасын әзірлеуге қол қойғанын айтты.

“The Qazaq Times”