Фото: ohotniki.ru

5-сәуір күні Астанада ер адам оқпен ұсталды деп хабарлады Ұлттық ұлан баспасөз қызметі. 

Ұлттық ұлан жауынгерлері қоғамдық тәртіп күзеті кезінде Байсейітова-Қарасай батыр көшелерінің қиылысынан күдікті азаматты кездестіреді. Ол әскерилерді көрген бойда, бағытын дереу өзгертіп көзден таса болуға тырысады. Алайда, 5573 әскери бөлімінің әскерилері оны тоқтатып, тексеруді жөн көреді.

Ұсталу кезінде 1977 жылы туған Поляков Сергей Владимирович масаң күйде болғандықтан, жақын маңдағы №21 полиция пунктіне жеткізіледі. Тексеру барысында оның қалтасынан 7,62 калибрлі жауынгерлік оқ пен 4 ұялы телефон табылды.

Күдікті азамат Сарыарқа аудандық ішкі істер басқармасына жіберіліп, оның үстінен Қазақстан Республикасы Қылмыстық Кодексінің 287 бабы бойынша – заңсыз қару немесе оқ-дәрі сақтағаны үшін қылмыстық іс қозғалды. Атылмыш факт Сотқа дейінгі тергеулердің бірыңғай реестіріне тіркелді.

“The Qazaq Times”