Күрдістан басшысы Масуд Барзани. Фото: The National.

Ирактағы Күрдістан Парламентіндегі отырыстан кейін, Күрд аймағының басшысы Масуд Барзанидың билігін үкімет, парламент және Әділет комиссиясына бөліп беру дауыспен мақұлданды. Ирактағы «Түркімен майданы» ұйымының мүшесі Айдын Маруф та осы жөнінде арнаулы мәлімдеме жасап растады. Бұл туралы BBC-дің ресми сайты жазды.

Маруфтың айтуынша, Күрд аймақтық әкімшілігінің басшылық лауазымын жою туралы да қарастырылу үстінде екен. Масуд Барзани өзінің Парламентке жазған хатында, 1 қарашадан бастап өкілетті мерзімі аяқталатын басшылық қызметін жалғастырмайтынын, өкілетті мерзімді ұзартуды да қабылдамайтынын айтқан.

Масуд Барзанидың міндет мерзімінің толуына байланысты басшылық қызметін қорытындылау және өткізіп алу жиналысы кезінде, оның жақтастары, Күрдістан демократиялық партиясының белсенділері жиын залына басып кіруге әрекет жасаған. Олар ғимаратты қоршап алып, қолдарына қаруларын ұстап, Барзаниды жақтап ұрандаған. Аспанға оқ атып, жиын залына басып кіруге тырысқан. Алайда, қауіпсіздік қызметкерлері оларды ғимараттан күштеп шығарған.

“The Qazaq Times”