АҚШ-тың Сүриядағы әскерилері. Фото: actualidad.rt.com.

АҚШ қарамағындағы Сүрияның солтүстігіндегі «ДАИШ-қа қарсы әскери коалиция сүриялық жай бұқараларды қырғындауда деп хабарлайды Түркия, Иран және Ресей ақпараттық агенттіктері. Ракка қаласы маңында сәрсенбі күні жүргізілген әскери операция кезінде АҚШ-тың ұшқышсыз ұшақтарының шабуылынан 29 жазықсыз бұқара көз жұмған. Бұл туралы «Парс.ақпарат» агенттігі өзінің ресми сайтында жазған болатын.

ИРНА-ның хабарлауына қарағанда, бұл реткі шабуылдан жарақат алған сүриялық әскери емес тұрғындар саны да көбірек болған. «ДАИШ-қа қарсы әскери коалиция» деп аталатын бұл қосынның маусым айының соңында жасаған бір реткі шабуылынан 90-нан астам адам қаза тапқан болатын. Оның басым көбі әйелдер мен балалар.

Жақында жарияланған мәліметтердің бірінде АҚШ-тың Сүрия мен Ирактағы әскери қосыны 2014 жылдан бері 3 мыңнан астам жазықсыз бұқараны оққа байлаған. Иран жақ АҚШ-ты «ДАИШ ұйымына соққы беру» сылтауымен жазықсыз Ирак және Сүрия азаматтарын қырғындауда деп айыптады.

“The Qazaq Times”