Фото: Аргументы и Факты

Мәскеуде жарылыс жасамақшы болды деген күдікпен төрт бірдей «Ислам мемлекеті» лаңкестік ұйымының жақтастары ұсталды деп хабарлайды ВВС ақпараттар қызметі.

Ресейдің федералды қауіпсіздік қызметінің (ФСБ) мәліметінше ұсталғандар Орталық Азия мен Ресей азаматтары. Күдіктілердің пәтерін тінту барысында үйден бомба жасайтын құрал-жабтықтар мен пайдалануға дайын қолдан жасалған жарылғыш заттар табылған.

Бұдан бұрын жергілікті БАҚ өкілдері Мәскеудің Новопеределкин көшесіндегі үйлердің бірінен жарылғыш зат табылғанын хабарлаған болатын.

Итерфакс ақпарат агенттігінің мәліметінше, Новопеределкин көшесі мен Боровск тасжолы қиылысында орналасқан үйлердің бірінен Ресейде тыйым салынған «Хизбут-Тахрир» ұйымының діни кітаптары табылған.

Ресейдің федералды қауіпсіздік қызметі бұған дейін Башқұртстан, Магадан облысын мен Тверде ел аумағында террорлық ұйымдарды қаржыландырып жүрген бес адамды ұстаған.

Естеріңізге салайық сәуірдің 3 күні Ресейдің Санкт-Петербург қаласының метросында жарылыс болып, салдарынан 16 адам көз жұмған болатын. Осыған байланысты жарылысты жасаған Акбаржон Жалиловпен қатысы бар деген күдікпен 11 адам қамауға алынған еді.

“The Qazaq Times”