Әлеуметтік желіде тараған видеодан скриншот.

Кеше, 15 тамызда Жамбыл облысы Меркі ауданы тауларында жауған қар аралас жаңбыр салдарынан Аспара-Шу автожолы мен Тараз-Шу теміржол көпірін тіреп тұрған бағаналар шайылып кетті. Осыған байланысты 15 тамызда пойыз қозғалысы тоқтатылған.

"Қазақстан темір жолы" АҚ-ның хабарлауынша, түнгі сағат 02.15-те бір бағыт бойынша пойыз қозғалысы ашылды. Қарсы қозғалыс таңғы сағат 8.20-да іске қосылды.

"Қалпына келтіру-жөндеу жұмыстарына арнайы темір жол және автотракторлық техника, темір жол көлігінің 75 қызметкері жұмылдырылды" деп хабарлады "Қазақстан темір жолы" АҚ.

Сел салдарынан қандай шығын болғаны әлі хабарланбады.

The Qazaq Times