Бағдаттағы АҚШ елшіліші. Фото: The Times of Israel

АҚШ Ирак жеріндегі әскери күштерін шығарып кету бойынша келіссөздер жүргізіп жатқан тұста, сол елдегі қарулы күштері мен әскери базаларына, тіпті елшіліктеріне бағытталған шабуыл қаупі арта түсті. Бір күн бұрын Ирак ақпарат құралдары АҚШ елшілігіне екі рет зымыран шабуылы жасалғанын хабарлады.

Бағдаттағы қорғауға алынған «жасыл аймақта» орналасқанына қарамастан АҚШ елшілігі екі реткі зымыран шабуылына тап болған. Бұл туралы ақпараттарда АҚШ тарабынан шығындар мен адам өлімі туралы анық мәлімет жоқ. Дегенмен, елшілік маңындағы көліктерге зақым келгені туралы айтылады.

Шабуылға байланысты АҚШ пен Ирак үкіметі ешқандай ресми мәлімдеме таратқан жоқ.

АҚШ әскери күштері Ирак жерінде Иранның жоғары дәрежелі әскери жетекшісі, генерал Қасым Сүлеймениді (Касим Сулаймани) және Ирактағы шиіт топтарының маңызды жетекшісін өлтіргеннен кейін АҚШ иелігіндегі нысандар шабуыл нысанасына айналды. Кезекті шабуылды ешбір қарулы топ өз мойнына алмағанымен, Иран қолдауындағы шиіт қарулы топтары жасаған болуы мүмкін деген болжамдар айтылады.

“The Qazaq Times”