Белгісіз үш адамның оппозициялық саясаткер Жасарал Қуанышалинді күштеп ұстап жатқан сәті. Алматы қаласы, 2021 жыл 1 шілде Фото: Видеоскриншот

Бүгін, 1 шілдеде Алматыда азаматтық киімдегі үш адам оппозициялық саясаткер Жасарал Қуанышәлинді үйінің ауласынан күштеп ұстап алып кетті. Оқиғаға саясаткерден сұқбат алуға барған «The Qazaq Times» тілшілері куә болды.  

Редакцияның түсірілім тобы кеше, 30 маусымда Жасарал Қуанышалинмен сұқбат жасауға уағдаласқан. Бүгін сағат 15:00-де саясаткердің үйіне барып, оны сұқбат алаңына алып бара жатқанда белгісіз адамдар Қуанышалинді күштеп ұстап әкетті. Азаматтық киімдегі үш адам өздерін таныстырған жоқ, қызметтік құжатын да көрсетпеді. Олар саясаткерді не себепті алып бара жатқанын да айтпады.

Шілденің 6-сы, астана күніне орай оппозициялық күштер халықты алаңға шақырған. Митинг күні жақындағанда елдің түкпір-түкпірінде белсенділердің ұсаталып жатқаны хабарланды. Полиция қудалап жатқандардың көбі «Қазақстанның демократиялық таңдауы» (ҚДТ) қозғалысы мен тіркелмеген «Көше» партиясының белсенділері. Қазақстан соты бұл екі ұйымға да «экстремист» деген айып тағып, елде жұмысына тыйым салған, ал Еуроодақ аталған ұйымдарды бейбіт қозғалыс деп есептейді.

"The Qazaq Times"