Қазақстандағы АҚШ елшісі У.Мозер. Фото: Ашық дереккөзден

Қазақстанға коронавирусқа қарсы америкалық вакциналарды, соның ішінде Pfizer өнімдерін жеткізуге мүмкіндік бар. Бұл туралы бүгін Қазақстандағы АҚШ елшілігі ұйымдастырған онлайн дөңгелек үстелде елші Уильям Мозер айтты.

Ол Қазақстанға Pfizer вакциналарын жеткізу бойынша келіссөздерден бейхабар, бірақ жеткізуге мүкіндік бар екенін айтты.

"Мен Қазақстанның америкалық вакциналарды сатып алу мүмкіндігі бар екенін білемін. Әрине, АҚШ жақтаушысы ретінде Қазақстанның біздің вакциналарды сатып алғанын қалар едім. Себебі мен оларды тиімді және өте жақсы вакциналар деп ойлаймын. Меніңше, жеткізу мүмкіндігі бар. Бірақ бұл - өте күрделі техникалық және коммерциялық мәселе. Мен нақты айта алмаймын. Менің ойымша, АҚШ-та біздің азаматтарымызды қамту үшін вакциналар жеткілікті" деді Мозер.

Pfizer – корнавирусқа қарсы вакциналардың арасынан қандай да бір нәтиже көрсеткен алғашқы екпе. Әлемнің бірқатар мемлекеті америкалық осы вакцинаны салдырып жатыр.

Қазақстан 2 ақпаннан бастап ресейлік "Спутник V" екпесін сала бастаған. Бұл вакцина қазір Ресей мен Қазақстаннан бөлек Аргентина, Венгрия, Венесуэла, БАӘ, Түркіменстан, Иранда да салынып жатыр. "Спутник V" екпесі екі дозадан тұрады. Екінші дозаны 21 күннен кейін салу керек. Денсаулық сақтау министрлігінің мәліметінше, 733 980 адам (халықтың 3,9 пайызы) коронавирусқа қарсы вакцинаның бірінші дозасын алған.  Бұдан бөлек, елде тағы бір вацина сынақтан өтіп жатыр. Атауы QazCovid-in-нан QazVac-қа өзгерген қазақстандық вакцина қазір сынақтың үшінші кезеңінде. Оны қазақстандық ғалымдар Жамбыл облысында дайындап жатыр.

"The Qazaq Times"