45 елдің әскери теңіз күштері бас қосты. Фото: Dawn.

Пәкістанның шақыруымен әлемнің теңізге шектесетін 45 елі қатысатын AMAN-2021 әскери оқу-жаттығулары Араб теңізінде басталды. Кезекті жаттығуға НАТО құрамындағы АҚШ, Британ, Түркия секілді елдер мен Ресей және Қытай бір уақытта қатыспақ. Бұл соңғы он жылдағы Ресейдің алғаш рет НАТО мүшелерімен ортақ әскери жаттығуға қатысуы. 

Пәкітсан ұйымдастырған бұл жаттығудың ұраны "Бейбітшілік үшін ынтымақ" деп аталады. Өткен аптада Пәкістан Ұлттық қорғаныс министрлігі мәлімдеме таратып, аталған көпұлтты әскери жаттығу дамуы мен ұлттық мүдделері теңізбен тығыз байланысты елдердің теңіз тасымал қауіпсіздігі, территориялық қауіпсіздігін, сондай-ақ терроризмге қарсы күрес тебінін арттыруға мүмкіндік беретінін айтқан.

Аталған жаттығу көп жылдан бері ұйымдастырылып келеді. Оған Үнді мұхиты мен Алант мұхитына шектесетін бірқатар африкалық елдерде қатысып келеді. Кезекті жаттығу Араб теңізінің шығысы мен солтүстік айдындарында бір аптаға созылмақ.

Тәуелсіз сарапшылардың пікірінше, экономикалық, индустиялық дамуы Қытай инвестициясына көбірек сүйенетін Пәкістан бұл жаттығу арқылы Қытайдың теңіздегі мүддесін қамтамасыз етуіне мүмкіндік бермек.

“The Qazaq Times”