АҚШ президенті Дональд Трамп. Фото: daktilo.com

АҚШ президенті Дональд Трамп коронавирусқа байланысты Еуропамен кеме қатынасы және авиатасымалдауды 30 күнге тоқтататынын хабарлады. Бұл шаралар жұмадан басталады.

Трамп халыққа коронавирустың таралуына байланысты арнаған үндеуінде «қатаң, бірақ қажетті шектеулер» коронавирусты жұқтырудың 460 оқиғасы тіркелген Ұлыбританияға қатысты қолданылмайтынын айтты. Сондай-ақ, ол конгресті коронавирустың АҚШ экономикасына әсерімен күрес аясында салық жүктемесін жеңілдету шараларын қолдануға шақырды.

Президент Трамп 11 наурыз күнгі мәлімдемесінде Еуропа елдерінің билігін вирустың таралуымен қажетті дәрежеде күреспеді деп сынады. Оның айтуынша, бірнеше АҚШ тұрғынына Еуропадан келгендерден вирус жұққан.

Кеше Дүниежүзілік денсаулық сақтау ұйымы коронавирус инфекциясының таралуын пандемия деп таныды. Женевада өткен брифиннг кезінде ұйым өкілдері: «Алдағы таяу күндері және таяу аптада COVID-19-ті жұқтыру фактілері, өлім жағдайлары және зардап шеккен елдер саны бұдан да артатынын болжап отырмыз. Біз COVID-19 инфекциясының таралуын пандемия деп сипаттауға болады деген тұжырымға келдік», – деді.

Бүгінгі деректер бойынша, әлемде қауіпті вирусты жұқтырғандар саны 124997 адамға жеткен. Қайтыс болғандар саны – 4622 адам. АҚШ-та 1122 адам қатаң бақылауға алынса, 37 адам өлім құшқан.

"The Qazaq Times"